Транспартны калапс у Менску: грамадскі транспарт ходзіць з перабоямі
7- 18.01.2019, 20:08
- 21,895
Увечары 18 студзеня Менск затрымаўся ў максімальных 10-бальных заторах.
Неспрыяльныя ўмовы надвор'я - адліга днём і паніжэнне тэмпературы да вечара, а таксама моцны вецер прывялі да таго, што праезная частка і ходнікі пакрыліся скарыначкай лёду.
Як паведамляе tut.by, гэта практычна паралізавала працу грамадскага транспарту, перасоўвацца па ходніках даводзіцца з асаблівай асцярожнасцю.
- Транспарт не едзе - буксуе. Ходнікі слізкія - пешаходы падаюць пачкамі, - паведаміла наша чытачка Ганна.
Многія менчукі скардзяцца, што грамадскі транспарт ходзіць з перабоямі. Тралейбусы і аўтобусы даводзіцца чакаць даўжэй, чым звычайна.
- Тралейбус чакала хвілін 40 на праспекце Жукава, - паведамляе яшчэ адна мянчанка.
«Паважаныя ўдзельнікі дарожнага руху! Дарога вельмі слізкая!
Выбірайце хуткасць руху зыходзячы са стану праезнай часткі і канкрэтнай сітуацыі на дарозе, часам яна можа не перавышаць і 20 км/г. Каб пазбегнуць спадарожнага сутыкнення - захоўвайце дыстанцыю, а лепш павялічце яе ўдвая-ўтрая!», - папярэджвае сталічная ДАІ і нагадвае, што асабліва ўважлівымі ў такое надвор'е варта быць і пешаходам.
«Калі падчас руху вы патрапілі ў цяжкае становішча праз непагадзь, вы можаце звярнуцца па дапамогу ў найбліжэйшае падраздзяленне ДАІ. Экіпажы ДПС арыентаваны на аказанне пасільнай дапамогі ўсім удзельнікам дарожнага руху, якія трапілі ў складаную сітуацыю на дарозе», - папярэджваюць інспектары.
Як мы ўжо паведамлялі, увечары 18 студзеня Менск затрымаўся ў максімальных, 10-бальных корках.
Праз іншыя ДТЗ на вуліцах Лабанкі, Ціміразева, Маскоўскай і Кнорына спыняўся рух тралейбусаў.