Павел Грыб у судзе заявіў пра падмену галоўнай сведкі і збіццё пры арышце ў Беларусі

Актывіст мяркуе, што ў Беларусь яго завабілі расейскія сілавікі.

Украінскі палітвязень Павел Грыб у судзе Растова-на-Доне (Расея) 18 студзеня заявіў, што ў судзе замест Таццяны Яршовай, якую ён нібыта схіляў да тэрарызму, выступала іншая дзяўчына, а перапіску ад яе імя вялі сілавікі. Пра гэта паведамляе выданне "Кавказский узел".

Грыб зачытаў заяву, у якой гаворыцца, што існуючы ў матэрыялах справы пераклад з украінскай мовы яго перапіскі з Яршовай «вельмі нізкай якасці», а скрыншоты перапіскі адсутнічаюць. З ягоных слоў, такія матэрыялы «сфармавалі пэўную прадузятасць у абвінавачвання і суда».

Грыб распавёў, што меў зносіны з Яршовай праз Skype свайго знаёмага Паўла Капіноса, з якім, як і з Яршовай, пазнаёміўся ў сацыяльнай сетцы «Укантакце».

«Доступ да старонкі меў не толькі я, але і Капінос», - падкрэсліў ён.

Палітвязень выказаў меркаванне, што ў чэрвені - жніўні 2017 года ад імя Яршовай з ім размаўлялі расейскія сілавікі, якія і наважылі яго выманіць.

«Са старонкі Яршовай напісалі, што супрацоўнікі ФСБ дазволяць ёй выехаць за мяжу пасля сустрэчы са мной у Гомелі, ад яе імя патрабавалі мае фота. Гэта была аператыўная легенда, як пазней я зразумеў. Я перакананы, што сапраўднай Яршовай не было на сустрэчы ў Гомелі і ў судзе. Усё гэта рабілася (сілавікамі), каб расправіцца са мной, пазбавіўшы волі і меддапамогі ў СІЗА», - падкрэсліў Грыб.

Ён дадаў, што сваю віну не прызнаваў і не прызнае.

Грыб распавёў пра збіццё падчас затрымання

Сустрэча, са слоў Паўла Грыба, была прызначаная ў буфернай зоне на беларуска-ўкраінскай мяжы, аднак у апошні дзень дзяўчына папрасіла прыехаць у Гомель.

«Магчыма, маці Яршовай і нейкая дзяўчына сустрэліся са мной у Гомелі. Пасля сустрэчы я пайшоў на аўтавакзал, каб вярнуцца ў Чарнігаў, аднак мяне сустрэлі невядомыя (мне) людзі. Іх было пяць, накінулі мне на галаву капюшон. Мяне пагрузілі ў мікрааўтобус, вывезлі ў лес, выкінулі там, затым з лесу прывезлі ў аддзел (cілавой структуры) на аўтазаку. Да мяне ўжывалі фізічную сілу, забралі дакументы і зваротны білет», - распавёў Павал Грыб.

Раней трое аператыўнікаў крымінальнага вышуку распавялі пра затрыманне Грыба ў горадзе Ярцава Смаленскай вобласці. Паводле версіі падсуднага, ён быў затрыманы іншымі людзьмі ў беларускім Гомелі.

Са слоў Грыба, па дарозе яго душылі. «У лесе, калі выцягнулі, таксама білі нагамі, (нанеслі) 10 удараў у жывот. У аддзеле пагражалі павесіць на шведскую сценку ўверх нагамі. Заходзіў яшчэ адзін мужчына і са словамі: «Гэта ты хацеў школу падарваць?» Нанёс з размаху яшчэ пару ўдараў па калене», - сказаў падсудны. Ён паведаміў, што затрыманне было аформленае пасля таго, як сілавікі дамагліся «фармальнага прызнання». «Увесь гэты час я быў прыкаваны да шведскай сценкі або 32-кілаграмовай гіры», - сказаў падсудны, дадаўшы, што зможа апазнаць усіх аператыўнікаў, хто знаходзіўся з ім.

Адказваючы на пытанні свайго адваката, Грыб растлумачыў, што ў Ярцава яму не давалі есці і піць, а пра сутнасць абвінавачвання ён упершыню даведаўся ад следчага. «Мне проста сказалі: «Альбо прызнаеш усё, альбо застаешся тут яшчэ на тыдзень», - заявіў падсудны.

Дзяржабвінаваўца Аляксей Ханеня абвясціў паказанні, у якіх Грыб пацвярджае, што абмяркоўваў з Яршовай інструкцыю вырабу нітрагліцэрыну. Падсудны заявіў суду, што падпісаў паказанні пад ціскам.

Павел Грыб паўтарыў, што не схіляў Яршову да вырабу бомбы. «Ніхто не збіраўся вырабляць выбух. Негатыўных водгукаў пра расейскіх настаўнікаў, аднакласнікаў не было. Яршова хацела нешта зрабіць, але не выбух, а дробнае хуліганства. Я не ўхваляў і не падтрымліваў (гэтыя) намеры», - запэўніў калегію суддзяў Грыб. Паведамленні пра нітрагіцэрын, са слоў Грыба, Яршовай адпраўляў не ён, а нехта іншы.

«Віну не прызнаваў і не прызнаю ніколі!» - рэзюмаваў Павел Грыб.

«Павел распавёў пра збіццё пры затрыманні, пра тое, як яго душылі выкрадальнікі, як здзекаваліся і выбівалі паказанні. Але рэакцыя суда нулявая», - канстатаваў 18 студзеня бацька Паўла Грыба на сваёй старонцы ў Facebook.

Пасля таго як у кастрычніку 2018 года да Грыбу не былі дапушчаныя ўкраінскія лекары, улады гэтай краіны абвінавацілі Расею ў наўмысным прычыненні шкоды здароўю падсуднага. 10 студзеня Еўразвяз запатрабаваў вызваліць Грыба, бо той мае патрэбу ў спецыялізаванай медыцынскай дапамозе. Аднак 17 студзеня Грамадская назіральная камісія Растоўскай вобласці заявіла, што яго стан здароўя не перашкаджае знаходзіцца пад арыштам.

Адзначым, што на пасяджэнні 18 студзеня прысутнічалі два прадстаўнікі СМІ, уключаючы карэспандэнта «Кавказского узла», маці Паўла Грыба, прадстаўнік генеральнага консульства Украіны ў Растове-на-Доне і адзін мясцовы жыхар.

24 жніўня 2017 года Грыба, што паехаў аж у Гомель (Беларусь) на сустрэчу з Яршовай, выкралі супрацоўнікі ФСБ Расеі. Два тыдні пра месцазнаходжанне ўкраінца не было вядома. 7 верасня Генеральнае консульства Украіны ў Растове-на-Доне атрымала паведамленне ад ФСБ пра ўтрыманне Грыба ў СІЗА Краснадара. У РФ украінца абвінавацілі ў падрыхтоўцы тэракту ў адной са школ Сочы.

3 ліпеня 2018 года бацька Грыба Ігар распавёў, што падчас этапавання з Краснадара ў Растоў-на-Доне ягоны сын быў збіты іншымі вязнямі, якія даведаліся, паводле якога артыкула ён абвінавачваецца. У яго таксама забралі перададзеныя консуламі прадукты і рэчы. 5 ліпеня ўпаўнаважаная Вярхоўнай Рады ў правах чалавека Людміла Дзянісава адправіла ў апарат расейскага амбудсмена Таццяны Маскальковай зварот з нагоды стану здароўя Грыба і інфармацыі аб яго збіцці. Медыкі ў расейскім СІЗА не знайшлі сведчанняў збіцця Грыба, паведамілі 5 ліпеня ў Федэральнай службе выканання пакаранняў РФ.

23 ліпеня ў судзе Растова-на-Доне пачалі разглядаць справу ўкраінскага палітвязня. Ён сваю віну не прызнаў. Суд адправіў абвінаваўчае заключэнне на дапрацоўку.

15 лістапада суд паўторна пачаў разгляд справу па сутнасці. Грыб зноў заявіў пра невінаватасць і адмовіўся даваць паказанні.

12 снежня Грыбу стала дрэнна ў судзе, пасяджэнне перанеслі на 21 снежня.

18 снежня ўкраінскі лекар, доктар медыцынскіх навук, прафесар Васіль Прытула заявіў, што захворванні Грыба прагрэсуюць, між іншым, партальная гіпертэнзія, спленамегалія (павелічэнне селязёнкі) і гіперспленізм (павелічэнне селязёнкі з ростам колькасці клеткавых элементаў у костным мозгу).

Акрамя таго, канстатаваны цыроз печані і зніжэнне згусання крыві.

Ёсць пагроза абвастрэння язвавай хваробы дванаццаціперснай кішкі, з'яўлення язвы страўніка і крывацёкаў.