Жыхар Брагіна паставіў на месца «дармаедскую» камісію

Уладзімір Церамецкі праз суд запатрабаваў выключыць ягоныя звесткі з базы «дармаедаў».

Стала дзейная так званая «дармаедская» камісія ў Брагіне прызнала мясцовага жыхара Уладзіміра Церамецкага «занятым» у эканоміцы. Пра гэта яму паведамілі з камітэта працы, занятасці і сацабароны Гомельскага аблвыканкама, піша «Гомельская весна».

«Згодна з інфармацыяй райвыканкама 08.01.2019 года Вы прызнаныя занятым у эканоміцы, як вырабнік прадукцыі раслінаводства, жывёлагадоўлі на зямельным надзеле, які знаходзіцца на тэрыторыі Брагінскага раёна», - напісаў «не занятаму» мужчыну старшыня камітэта працы Гомельскага аблвыканкама Пётр Шуцько.

Фішка ў тым, што двума тыднямі раней гэтая ж камісія ўключыла 52-х гадовага мужчыну ў так званую базу «не былі занятыя» і запатрабавала пацвердзіць занятасць у эканоміцы. У адказ ён запатрабаваў не толькі выключыць яго з базы «дармаедаў», але і праверыць абноўлены дэкрэт на адпаведнасць Канстытуцыі.

«Два дзясяткі чыноўнікаў так званай «дармаедскай» камісіі не праверылі наяўнасць зямельнага надзелу ў вёсцы перад тым, як уключыць мяне ў базу не занятых. Я ім адказаў, што ў судзе буду даводзіць сваю правату. Як бачыце - падзейнічала!», - смяецца мужчына.

Акрамя выключэння з «дармаедскай» базы, Церамецкі патрабаваў і праверкі канстытуцыйнасці рэанімаванага «дармаедскага» дэкрэта. На гэты конт камітэт працы нагадаў пра ўпаўнаважаных на зварот у Канстытуцыйны суд суб'ектаў, адказаўшы фармальна, што «аблвыканкам не надзелены паўнамоцтвамі ацэнкі законнасці актаў прэзідэнта і Саўміна або ўнясення прапаноў аб праверцы іх канстытуцыйнасці».

Прававы інспектар працы незалежнага прафзвязу РЭП Леанід Судаленка, які дапамагаў мужчыну выбудоўваць прававую аргументацыю, задаволены развіццём падзей. «У краіне на аднаго «не занятага» стала менш, гэта плюс. Мінусам з'яўляецца не жаданне камісіі разбірацца з дэкрэтам аб «дармаедах» у судзе», - адзначыў інспектар працы.

«Наша прававая пазіцыя застаецца ранейшай. Кожны праз спажыванне тавараў і паслуг выплачвае ўскосныя падаткі, такім чынам, удзельнічае ў эканоміцы. Аплатай «камуналкі» ў падвышанай суме ўлада прымушае людзей да працы, тым самым парушае нашы канстытуцыйныя правы», - перакананы прафсаюзны юрыст.