Вываз капіталу з РФ дасягнуў грандыёзных маштабаў

Вываз капіталу знік з статыстыкі Банка Расеі пасля велізарнага выцеку.

Паказчык «чысты вываз капіталу прыватным сэктарам» знік з усіх справаздач Банка Расеі на фоне моцнага пагаршэння статыстыкі ў 2018 годзе, піша finanz.ru.

Пасля таго як адток паскорыўся ў 2,7 раза і дасягнуў рэкорду з 2014 года, ЦБ наважыў перайменаваць адпаведны радок у сваіх публікацыях.

Ранейшую назву - увоз/вываз капіталу - замянілі на нейтральную «фінансавыя аперацыі прыватнага сэктара», перапісаўшы не толькі новыя рэлізы, але і ўсе публікацыі аж да 1994 года.

Пастанова была прынятая ў мэтах «гарманізацыі тэрміналогіі», каб яна адпавядала сістэме нацыянальных рахункаў Расстата, вынікае з тлумачэнняў прэс-службы цэнтральнага банка.

Раней ЦБ паведамляў, што адток капіталу «можа быць і добрай навіной», даводзячы, што пад вывазам не абавязкова разумеюцца незаконныя аперацыі. Гэта можа быць, напрыклад, проста купля замежнай валюты насельніцтвам або бізнэсам.

Але пераканаць эканамістаў не выпала. «Грандыёзны маштаб вываду капіталу з краіны» падкрэслівае «падзенне даверу да эканомікі», каментуе статыстыку ЦБ кіраўнік аналітычнага дэпартамента «Локо-Інвест» Кірыл Трэмасаў.

За год адток дасягнуў 67,5 млрд даляраў, чаго цэнтральны банк не фіксаваў ні разу з крызіснага 2014 года. Пры гэтым за чацвёрты квартал іх краіны ўцякло 36,5 млрд даляраў - амаль у 1,5 раза больш, чым за ўвесь мінулы год.

9,6 млрд даляраў за год забралі замежныя інвестары з рынку дзяржаўнай запазычанасці; яшчэ 20 млрд было накіравана расейскімі кампаніямі ў замежныя актывы. Напэўна, гаворка ідзе пра сродкі, якія сыравінныя экспарцёры пакінулі за мяжой, наважыўшы не пералічваць іх на расейскія рахункі, кажа эканаміст ING Дзмітрый Далгін.

Адначасова зачыніліся рынкі капіталу: у другой палове года выйшла рэфінансаваць толькі 60% замежнай завінавачанасці (супраць 86% у 1-2 квартале), зазначае аналітык Райфайзэнбанка Дзяніс Парывай.

Акрамя таго, імкліва вырас ценявы адток. Хоць фармальна ЦБ не выявіў «сумнеўных аперацый» (іх суму ацанілі на нуль даляраў), у радку «памылкі і прагалы» за кастрычнік-снежань апынуліся струмені на 5,6 млрд даляраў. Гэта сродкі, якія былі выведзеныя з краіны пры пакуль нявысветленых абставінах.

Менавіта адток капіталу стаў прычынай імклівай дэвальвацыі рубля ў 2018 годзе, зазначае Трэмасаў: сітуацыя з прытокам валюты была выключна спрыяльнай.

Сярэдняя цана нафты вырасла на 16 даляраў, экспартныя даходы падскочылі на 25% (да 443 млрд даляраў), чысты прыток ад замежнага гандлю - на 68%.

За год сальда бягучага рахунку (розніца паміж асноўнымі струменямі ў Расею і за мяжу) склала 114,9 млрд, або 7% УБП, што стала абсалютным гістарычным рэкордам.

«Моцнай дэвальвацыі рубля, якую мы назіралі летась (-17%) на фоне такога высокага прафіцыту СТА - гэта ўнікальны выпадак» - высноўвае Трэмасаў.