National Interest: Расея не зможа адрадзіць флот Ту-160

У Масквы няма кваліфікаваных спецыялістаў.

Расея нацэлілася на аднаўленне вытворчасці стратэгічных бамбавікоў Ту-160. Аднак, нягледзячы на тое, што першы самалёт ужо ў працэсе пабудовы, наўрад ці Масква зможа разгарнуць поўнамаштабную серыйную вытворчасць, піша unian.net.

«Без сумневу, серыйная вытворчасць пачнецца ў найбліжэйшай будучыні», - паабяцаў намеснік міністра абароны РФ Аляксей Крываручка.

«Мы пачакаем да першага палёту, завяршэння эксперыментальнай распрацоўкі і пасля гэтага будзе прынятая пастанова пра серыйныя пастаўкі», - дадаў ён.

Як піша National Interest, Ту-160 - гэта самы вялікі, самы магутны і самы дарагі бамбавік у арсенале Расеі. Падобны памерамі да амерыканскага B-1 Lancer (падабенства можа быць зусім не выпадковым), расейскі самалёт мае складаную гісторыю. Ту-160 - звышгукавы бамбавік са зменнымі стрэлападобнымі крыламі. Ён стаў адным з апошніх савецкіх распрацовак часоў Халоднай вайны. Крэмль узяў яго на ўзбраенне ў 1987 годзе. Усяго СССР пабудаваў блізу двух дзесяткаў такіх бамбавікоў. І многія з іх былі ў руках Украіны пасля распаду савецкай імперыі. Праўда, Кіеў аддаў некаторыя з іх Расеі, а іншыя дэмантаваў. Таму цяпер у расейскім войску ёсць 16 Ту-160.

Найноўшая мадыфікацыя самалёта - гэта Ту-160М2. І рэальным увасабленнем гэтай мадэлі стануць абноўленыя старыя бамбавікі, а таксама абяцаныя два новыя. Праўда, у сакавіку 2018 года намеснік міністра абароны РФ Юрый Барысаў сказаў, што Ту-160М2 - гэта зусім новы самалёт у параўнанні з арыгінальнай мадэллю.

«Мы збіраемся закупіць цэлы флот новых стратэгічных бамбавікоў найноўшай мадэлі, а таксама абнавіць старыя самалёты. Ад арыгінальнай распрацоўкі застанецца толькі фюзеляж. А ўсё бартавое радыётэхнічнае абсталяванне і рухавікі будуць замененыя», - сказаў Барысаў.

Ён таксама дадаў, што Ту-160М2 будзе мець тэхналогію «стэлс» праз «спецыяльнае пакрыццё». Таксама пускавыя ракетныя ўстаноўкі на яго борце будуць абноўленыя. Серыйную вытворчасць новай мадэлі бамбавіка, з ягоных слоў, пачнецца ў 2030-х гадах.

Нягледзячы на тое, што Ту-160 падобны на B-1, ён пабудаваны на аснове цалкам іншай канцэпцыі. Амерыканскі самалёт быў прызначаны для пранікнення на савецкую тэрыторыю на нізкіх вышынях, што дазволіла б яму пераадолець савецкую сістэму СПА. У сваю чаргу, Ту-160 узброены ракетамі далёкага палёту. Ён таксама можа запускаць са свайго борта крылатыя ракеты з ядзернымі боегалоўкамі. Такім чынам, ён можа заставацца на адлегласці ад варожых сістэм абароны.

Праблема з адраджэннем Ту-160 у 21 стагоддзі заключаецца не так у самой канструкцыі самалёта, як у магчымасцях расейскіх заводаў і канструктарскіх бюро. Як гэта часта бывае, толькі вытворчасць якога-небудзь віду зброі спыняецца, дэталі і вытворчы досвед таксама страчваецца назаўсёды. Вытворчасць арыгінальнага Ту-160 спынілася ў 1992 годзе.

«Усе дэталі распрацоўкі, канструкцыі і інжынерныя веды застаюцца толькі на паперы. У абароннай прамысловасці РФ проста няма працоўнай сілы, якая разбіраецца ў Ту-160», - растлумачыў аналітык Максім Старчак.