СМІ: Ізраіль знішчыў восем расейскіх батарэй СПА

Новыя падрабязнасці апошняга ўдару па Сірыі.

Ізраільскія вайскоўцы знішчылі восем батарэй СПА ўчарашнімі ударамі па Сірыі. Аб гэтым піша газета "Гаарэц". Сярод атакаваных былі сістэмы расейскай вытворчасці, у тым ліку С-75, С-125, "Бук", "Панцыр", а таксама радар, які ўваходзіць у комплекс супрацьпаветранай абароны.

Са звестак тэлеграм-канала Directorate 4, у ліку знішчаных быў зенітны комплекс "Аса".

Як паказвае "Гаарэц", сірыйскія і расейскія вайскоўцы дагэтуль не задзейнічалі свае больш дасканалыя сістэмы – С-300. Бяздзейнічаюць і С-400, якія стаяць на ўзбраенні Расеі і кіруюцца выключна расейцамі. Іх задача - абараняць пазіцыі расейскіх войскаў у рэгіёне.

Праз дзень пасля адной з самых маштабных ізраільскіх аперацый у Сірыі Масква па-ранейшаму не выступіла з асуджэннем на адрас ізраільцян, гаворыцца ў матэрыяле ізраільскай газеты.

Падчас аналагічнай маштабамі ізраільскай атакі 25 снежня Мінабароны Расеі абвінаваціла Ізраіль у парушэнні суверэнітэту Сірыі і стварэнні пагроз для цывільнай авіяцыі. У нядзелю расейскія вайскоўцы заявілі, што сірыйцы абараняліся ад ізраільскіх ракет з дапамогай сродкаў СПА расейскай вытворчасці – "Панцыр" і "Бук". Напярэдадні прэс-служба Войска абароны Ізраіля паказала відэа знішчэння батарэі "Панцыр С-1", які беспаспяхова спрабаваў збіць ізраільскую ракету, якая ляціць у яго бок. Здымка вялася ўсталяванай на ізраільскай ракеце відэакамерай.

У верасні сірыйскія вайскоўцы пры спробе збіць ізраільскі знішчальнік памылкова знішчылі расейскі самалёт-выведнік, што прывяло да гібелі 15 расейскіх вайскоўцаў. Расея абвінаваціла Ізраіль у спробе "прыкрыцца" расейскім самалётам і паставіла войскам сірыйскага прэзідэнта Башара Асада восем батарэй С-300. Згодна з задумай Масквы, яны павінны былі стрымаць ізраільскую вайсковую актыўнасць у рэгіёне. Гэтага, аднак, не адбылося: менш чым за месяц паведамлялася аб чатырох эпізодах ізраільскіх нападаў, у тым ліку двух масаваных.

СПА Сірыі

Фактычна ўсе сродкі СПА, што стаяць на ўзбраенні Сірыі, былі пастаўленыя сірыйскаму ўраду Савецкім Саюзам і Расеяй.

Першыя пастаўкі комплексаў СПА ў Сірыю адбыліся ў 1968 годзе. Савецкае кіраўніцтва прыняло такую пастанову пасля шасцідзённай вайны, падчас якой ізраільская авіяцыя знішчыла ад 54 да 60 з 106 сірыйскіх самалётаў, многія з якіх былі знішчаныя проста на аэрадромах. Да пачатку вайны суднага дня 1973 года ў складзе СПА Сірыі налічвалася 12 дывізіёнаў ЗРК С-75М, 8 дывізіёнаў ЗРК С-125 і 14 батарэй ЗРК "Квадрат". У працэсе канфлікту сілы СПА Сірыі і Егіпта разам знішчылі 82 самалёты ВПС Ізраіля, што ў выніку склала 85% усіх страт ізраільскай авіяцыі. Аднак пачынаючы з 20 лістапада 1983 года, Ізраіль страціў толькі адзін самалёт падчас шматлікіх вайсковых аперацый: 10 лютага 2018 года Ізраільскі F-16 быў падбіты кіраванай Сірыйскай ракетай, пасля чаго ВПС Ізраіля нанеслі хвалю ўдараў па 12 сірыйскіх і іранскіх аб'ектах.

Цяпер на ўзбраенні Сірыі знаходзіцца звыш 900 зенітных ракетных комплексаў і больш за 4000 зенітных гармат калібру 23-100 мм, пастаўленых у розны час Масквой. 30 сірыйскіх ЗРК прыпадае на С-75 "Дзвіна" і С-75М "Волга", 200 — "Куб", 140 — С-125 "Нява" і С-125М "Пячора", 60 — "Аса". Паводле нядаўняга аналізу Jerusalem Post, усе яны прадэманстравалі сваю неэфектыўнасць у барацьбе супраць ізраільскіх аперацый, у тым ліку калі гаворка ідзе пра малапрыкметныя знішчальнікі F-35, а таксама крылатыя ракеты.

Масаваны ўдар

Уночы 21 студзеня вайсковыя-паветраныя сілы Ізраіля нанеслі масаваны ўдар па Сірыі. Расейскія вайскоўцы паведамілі пра тое, што сірыйскія войскі нібыта збілі 30 ізраільскіх ракет, аднак прызналі гібель як мінімум чатырох сірыйскіх вайскоўцаў. Назіральнікі паведамілі аб вялікіх разбурэннях, а таксама гібелі 11 сірыйскіх вайскоўцаў і байцоў узброеных фармаванняў.

Раней заявы расейскіх і сірыйскіх бакоў аб перахопе Ізраільскіх ракет не знаходзілі пацвярджэнняў.

Як паведамляе Войска абароны Ізраіля, аб'ектамі атакі сталі пазіцыі іранскіх сіл і батарэі супрацьпаветранай абароны. "Гаарэц" паведамляў пра 10 знішчаных цэляў. Са звестак ЦАХАЛ, былі атакаваныя склады з узбраеннем у міжнародным аэрапорце Дамаска, штаб выведкі ды іранскі трэнінгавы лагер.

Габрэйскія вайскоўцы падкрэслілі, што Бамбаванні зробленыя ў адказ на запуск іранскай ракеты класа "зямля-зямля" па ізраільскай тэрыторыі, які адбыўся 20 студзеня. Набой быў перахоплены сістэмай "Жалезны купал". Як сцвярджаецца, у ходзе аперацыі сірыйскія сілы СПА зазналі ўдары пасля таго, як запусцілі дзясяткі ракет па самалётах Ізраіля.

Раней у гэтым месяцы начальнік Генштаба Войска абароны Ізраіля Гадзі Айзэнкот распавёў аб тым, што за апошнія некалькі гадоў ізраільскія самалёты знішчылі "тысячы цэляў" ў Сірыі. Паводле ягоных слоў, за адзін толькі 2018 год было скінута дзве тысячы бомбаў на звязаныя з Іранам аб'екты ў Сірыі. Улады габрэйскага дзяржавы неаднаразова заяўлялі аб тым, што не дазволяць Ірану і звязаным з ім групоўкам ператварыць Сірыю ў базу для наступу на Ізраіль.