У Расеі захапілі пасажырскі самалёт

Пасажыр рэйса Сургут - Масква запатрабаваў накіраваць лайнер у Афганістан.

Адзін з пасажыраў авіярэйса Сургут - Масква падчас палёту запатрабаваў змяніць кірунак лайнера і адправіць яго ў Афганістан. Пра гэта паведаміла «Інтэрфаксу» ў аўторак крыніца ў авіядыспетчарскіх службах.

Паводле звестак сэрвісу Flight Radar, на борце адбылася няштатная сітуацыя. Самалёт змяніў кірунак палёту. Мяркуючы з траекторыі, відавочна, што ён накіроўваецца ў бок Ханты-Мансійска.

У даведачнай службе аэрапорта Сургута агенцтву паведамілі, што рэйс выконвае авіякампанія «Аэрафлот». «У нас няма ніякай інфармацыі, толькі тое, што самалёт паспяхова вылецеў», - сказаў суразмоўца агенцтва.

Як паведамляецца ў Telegram-канале радыёстанцыі «Говорит Москва» са спасылкай на звесткі маніторынгавых парталаў, гэты самалёт здзейсніў разварот і ў гэты момант накіроўваецца ў аэрапорт вылету.

Маскоўскі аэрапорт Шарамеццева паведамляе, што самалёт накіраваны ў Ханты-Мансійск.

Рэн ТБ паведамляе, што адзін з пасажыраў рэйса ўзброены, ён запатрабаваў змяніць маршрут. Паводле звестак тэлеканала, гэта нейкі Павел Ш. Яму 41 год і падчас узлёту ён сядзеў на месцы 14а. Самалёт павінен быў прыбыць у Маскву а 16:20 (паводле менскага часу).

Інфармацыя пра захоп самалёта, які накіроўваецца маршрутам Сургут - Масква, пацвярджаецца: цяпер спецыялісты ў арганізацыі паветранага руху пракладваюць маршруты прытрымлівання борта ў адпаведнасці з патрабаваннямі захопніка. Пра гэта «Ленте.Ру» паведаміла крыніца ў праваахоўных органах.

Паводле папярэдніх звестак, пасажыр запатрабаваў развярнуць лайнер у палёце і накіравацца ў Афганістан.

«Наземныя службы атрымалі з авіялайнера сігнал аб захопе, кантрольным пытаннем ён быў пацверджаны. Паводле папярэдніх звестак, на борце адзін захопнік - псіхічна хворы мужчына. Цяпер самалёт развярнуўся і накіроўваецца назад, у бок Ханты-Мансійска», - сказала крыніца. Ён таксама адзначыў, што цяпер сувязі з бортам няма.

На борце самалёта знаходзяцца 69 пасажыраў, у тым ліку адно немаўля, а таксама сямёра чальцоў экіпажа.

А 14.24 (паводле менскага часу) самалёт авіякампаніі «Аэрафлот», які ляцеў з Сургута ў Маскву, прызямліўся ў Ханты-Мансійску, вынікае са звестак сайта FlightRadar.

«Самалёт прызямліўся ў аэрапорце Ханты-Мансійска. Больш пакуль ніякай інфармацыі», - паведамілі РБК у аддзяленні інфармацыі і грамадскіх сувязей управы на транспарце МУС Расеі па УРФА.

Пасажыр авіярэйсу Сургут-Масква, які запатрабаваў развярнуць самалёт у Афганістан, затрыманы, зброі пры ім не выяўлена, паведаміў «Інтэрфакс» са спасылкай на дасведчаную крыніцу.