У стозе сена ў Лельчыцкім раёне знайшлі 100-кілаграмовую авіябомбу

Боепрыпасы праляжалі ў двары бабулі дзясяткі гадоў і цудам не выбухнулі.

У вёсцы Буйновічах Лельчыцкага раёна нядаўна падняўся перапалох: у двары 86-гадовай Марыі Дзмітрыеўны знайшлі бомбу. Выявілася, што небяспечную знаходку даўным-даўно прыцягнуў дадому цяпер нябожчык муж бабулі, піша kp.by.

- Мужчына адпілаваў хваставую частку авіябомбы, затым схаваў у сене. У месцы распілоўвання знаходзіўся тратыл. Дакладна невядома, дзе мужчына знайшоў авіябомбу, як здолеў транспартаваць, а самае галоўнае, чаму падчас усіх праробленых маніпуляцый яна не выбухнула, бо была з загваздкай, то бок, знаходзілася ў баявым стане, - распавялі ва УУС Гомельскага аблвыканкама.

Як стала вядома журналістам, пра бомбу выпадкова даведалася дачка пенсіянеркі, якая жыве па суседстве. Калі яна вазіла праз двор гной побач са стогам сена, бабуля прыгадала, як паўтара гады таму муж перад смерцю адкрыў ёй таямніцу. Спалохаўшыся за дачку, Марыя Дзмітрыеўна расказала ёй пра бомбу. Тая патэлефанавала ўчастковаму. Міліцыянт асцярожна разабраў стог і пераканаўся: усярэдзіне сапраўды была бомба.

- Колькі яна там ляжала - Бог святы яе ведае. Напэўна, яшчэ з савецкага часу, - успамінае бабуля.

Справа ў тым, што недалёка, у палескай глушы, раней быў палігон, там на мішэні поля бамбавікі скідалі бомбы. Некаторыя з іх не выбухалі і так і заставаліся на полі. А тое, што дрэнна ляжыць палешукі, бывала, прыцягвалі да сябе дадому - раптам у гаспадарцы спатрэбіцца. Так, мабыць, было і ў выпадку з гэтай бомбай. Напэўна, даведаўшыся, што яна баявая, вясковец наважыў схаваць бомбу далей, нікому нічога не сказаўшы. З тых часоў сям'я і суседзі, можна сказаць, жылі як на парахавой бочцы.

Справа была напярэдадні Вадохрышча - паведамленне пра бомбу паступіла ў пятніцу, а сапёры з гомельскай вайсковай часткі 5525 маглі прыехаць толькі назаўтра, таму ўчастковы ўсю ноч дзяжурыў ля небяспечнай знаходкі, чакаючы вайскоўцаў. Тыя шчасна вынялі бомбу і забралі. Яе ідэнтыфікавалі як савецкую аскепкава-фугасную авіяцыйную бомбу пасляваеннага перыяду. Сапёры знішчылі авіябомбу на палігоне.