У ПАРЭ паказалі фільм пра вязняў Крамля

Фільм «Закладнікі Пуціна: украінскія палітвязні Крамля» знялі польскія рэжысёры.

У Парламенцкай асамблеі Рады Еўропы паказалі дакументальны фільм «Закладнікі Пуціна: украінскія палітвязні Крамля».

Як напісаў кіраўнік украінскай дэлегацыі Уладзімір Ар’еў, фільм стварылі польскія рэжысёры.

На паказе прысутнічалі сваякі і адвакаты ўкраінскіх ваеннапалонных маракоў і прадстаўнікі ўкраінскага амбудсмэна.

24 студзеня ў ПАРЭ павінны прайсці дэбаты і галасаванне за рэзалюцыю, якая асуджае агрэсію Расеі ў Керчанскай пратоцы і заклікае вызваліць захопленых украінскіх маракоў.

Зараз у Расеі і на тэрыторыі акупаванага Крыма незаконна ўтрымліваюць блізу 70 украінцаў.

Прадстаўнікі міжнароднай супольнасці, афіцыйныя ўстановы заходніх краін, вядомыя палітыкі, культурныя і грамадскія дзеячы неаднаразова звярталіся да Расеі з патрабаваннем вызваліць Алега Сянцова, Уладзіміра Балуха і астатніх украінскіх палітвязняў. Расея дагэтуль адхіляе ўсе гэтыя заклікі.

Акрамя таго, у Расеі ўтрымліваюць 24 украінскіх маракоў, якія былі захопленыя падчас агрэсіі ў Азоўскім моры.