Французскія «жоўтыя камізэлькі» возьмуць удзел у выбарах у Еўрапарламент
1- 24.01.2019, 12:41
- 7,047
У групу кандыдатаў уваходзяць 10 чалавек.
Прадстаўнікі пратэстнага французскага руху «жоўтыя камізэлькі» абвясцілі аб планах выставіць кандыдатаў на выбарах у Еўрапейскі парламент, якія адбудуцца ў траўні.
Пра гэта паведамляе Euractiv.
У групу кандыдатаў уваходзяць 10 чалавек ва ўзросце ад 29 да 53 гадоў, сярод якіх - кіроўца пагрузчыка, хатняя гаспадыня і дырэктар у продажах.
Спіс узначаліць Інгрыд Левавазье, якая сама выхоўвае дваіх дзяцей і працуе сядзелкай у Нармандыі. Надоечы яна адхіліла прапанову стаць каментатарам тэлеканала BFM пасля атрымання пагроз ад іншых прадстаўнікоў «жоўтых камізэлек», якія ставяцца да вядучых медый з падазрэннем.
Прэс-сакратар групы Айк Шахінян заявіў, што агулам будуць прадстаўлены 79 кандыдатаў, а астатнія 69 будуць абраныя на ўнутраным галасаванні да сярэдзіны лютага.
Апублікаванае ў сераду апытанне паказала, што «жоўтыя камізэлькі», якія пачалі антыўрадавыя акцыі пратэсту ў сярэдзіне снежня, могуць атрымаць 13% галасоў на выбарах.
Сацыёлагі мяркуюць, што ўдзел «жоўтых камізэлек» у выбарах найперш можа адцягнуць галасы ў правай партыі Марын Ле Пэн.