Галоўны траўматолаг, у якога знайшлі $500 тысяч, выйшаў на волю

Аляксандр Бялецкі знаходзіцца дома з 7 студзеня.

Былы дырэктар Рэспубліканскага навукова-практычнага цэнтра траўматалогіі і артапедыі Аляксандр Бялецкі некалькі тыдняў таму пакінуў СІЗА КДБ. Пра гэта tut.by распавялі дзве крыніцы, не звязаныя адна з адной.

«З 7 студзеня ён дома», - сказаў адзін са знаёмых Бялецкага. «Таксама чуў, што Аляксандра Валянцінавіча вызвалілі. Але не думаю, што кропка [ў яго справе] пастаўленая», - мяркуе другая крыніца.

У прэс-службе КДБ адмовіліся ад каментароў.

Пра затрыманне Бялецкага стала вядома летам мінулага года падчас маштабнай спецаперацыі сілавікоў паводле «справы медыкаў». Старшыня КДБ Валерый Вакульчык заявіў, што Аляксандр Бялецкі быў арыштаваны за арганізацыю правядзення тэхнічнага абслугоўвання і рамонту медабсталявання з боку камерцыйных структур і своечасовую плату за нададзеныя паслугі. Пры правядзенні ператрусу ў ягоным гаражы і па месцы жыхарства ў схованках выяўлена блізу 500 тысяч даляраў у эквіваленце, адзначыў Вакульчык.

13 верасня калектыву Рэспубліканскага навукова-практычнага цэнтра траўматалогіі і артапедыі прадставілі новага дырэктара - Міхаіла Герасіменку, які ўзначальваў Беларускую акадэмію паслядыпломнай адукацыі. Герасіменка - вучань Бялецкага.

Цікава, што за некалькі месяцаў да свайго затрымання Аляксандр Бялецкі быў уганараваны звання акадэміка, да якога ішоў амаль 20 гадоў. Ён сказаў СТВ, што ганарыцца больш за ўсё не колькасцю ўнікальных аперацый, а вучнямі і магутнай школай, якую ўдалося стварыць у краіне.