Кіраўнік МПЗ Беларусі: Падатковыя льготы прымушаюць хадзіць з працягнутай рукой

Міністр шукае апраўданні для ўзмацнення жорсткасці падатковай палітыкі?

Калі адмовіцца ад некаторых індывідуальных падатковых ільгот для суб'ектаў гаспадарання Беларусі, то можна знайсці новыя рэзервы для папаўнення бюджэту, паведаміў у эфіры тэлеканала "Беларусь 1" міністр падаткаў і збораў Сяргей Налівайка.

Да такіх рэзерваў можна аднесці індывідуальныя льготы для суб'ектаў гаспадарання, якія існуюць толькі для таго, каб яны працягвалі весці сваю гаспадарчую дзейнасць.

«І добра, калі гэтыя льготы даюць нейкі імпульс для развіцця прадпрыемства, яго выхаду на больш высокі ўзровень. На жаль, часцяком гэта толькі разбэшчвае суб'екты гаспадарання і прывучае іх хадзіць з працягнутай рукой, і нават не прасіць, а патрабаваць гэтыя льготы», - адзначыў Налівайка.

Налівайка адзначыў, што ў Беларусі 95% плацельшчыкаў выконваюць падатковае заканадаўства і не дапускаюць парушэнняў. Прыкладна 4% дапускаюць парушэнні з аб'ектыўных прычын - няведанне, няпамятлівасць або адсутнасць грошай на рахунках. І толькі 1 адсотак плацельшчыкаў не плаціць падаткі свядома.