Кангрэс ЗША падрыхтаваў рэзалюцыю аб прыпыненні скасавання санкцый супраць «Русала»

Угода адміністрацыі Трампа з Дзерыпаскам трапіла пад прыцэл амерыканскага кангрэса.

Угода адміністрацыі Дональда Трампа з расейскім мільярдэрам Алегам Дзерыпаскам, якая дазваляе да сярэдзіне студзеня зняць санкцыі з «Русала», трапіла пад прыцэл амерыканскага кангрэса, паведамляе finanz.ru

Як паведамляе The Daily Beast, лідар дэмакратаў у Сенаце Чак Шумер падрыхтаваў рэзалюцыю аб прыпыненні дзеяння пагаднення, якое Дзерыпаска заключыў з Мінфінам ЗША пасля напружаных перамоў, якія доўжыліся больш за паўгода.

У рамках угоды, анансаванай 19 снежня, ЗША пагадзіліся на працягу 30 дзён выключыць En+, «Русал» і «Еўрасібэнерга» з «чорнага спісу», які забараняе любыя трансакцыі і дэ-факта выразае кампанію Дзерыпаскі з глабальнага рынку.

У адказ мільярдэр, некалі самы багаты чалавек у Расеі, які страціў праз санкцыі дзве траціны багацця, абавязаўся знізіць долю ў En+ з 70% да менш за 45% без якой-небудзь кампенсацыі.

Яго права голасу пры гэтым будзе абмежаваная 35-працэнтным пакетам. У радзе дырэктараў з 12 чалавек толькі чацвёра будуць яго прадстаўнікамі, а палову рады складуць грамадзяне Штатаў і Вялікабрытаніі.

І хоць, перадаўшы ЗША кантроль над сваёй алюмініевай імперыяй, сам Дзерыпаска застанецца ў «чорным спісе» Мінфіна, а яго ўласнасць па-ранейшаму будзе заблакаваная, угода дазволіць «Русалу» аднавіць продаж алюмінію на сусветным рынку і пазбегнуць дэфолту па вонкавым абавязку.

Пагадненне з Дзерыпаскам, які трапіў у SND-list за ўдзел у «зламысных дзеяннях Расеі», патрабуе тлумачэнняў, заявіў The Daily Beast сябра камітэта выведкі палаты прадстаўнікоў кангрэса Джым Хаймс. З ягоных слоў, далейшыя крокі будуць абмяркоўвацца на ўзроўні камітэтаў кангрэса.

Рэзалюцыя аб прыпыненні зняцця санкцый падрыхтаваная ў рамках закона «Аб супрацьдзеянні ворагам Амерыкі» (CAASTA), прынятага мінулым летам: ён дазваляе кангрэсу на працягу 30 дзён блакаваць любыя пастановы адміністрацыі, якія зніжаюць санкцыйны ціск на Расею.

Падрыхтоўка дакумента не азначае, што кангрэс ужо прыняў пастанову, падкрэсліў Шумер.

Кангрэсмены працягнуць ацэньваць умовы ўгоды, а гатовая рэзалюцыя патрэбна, каб у выпадку неабходнасці запусціць працэдуру яе блакавання, удакладніў ён.

«Людзі з Мінфіна павінны растлумачыць угоды на Капіталійскім пагорку. Нам трэба больш інфармацыі як мага хутчэй», - заявіў у сваю чаргу Хаймс.