Міністэрства аховы здароўя спрасціла патрабаванні да атрымання даведак для кіроўцаў

Што змянілася ў плане допуску да кіравання транспартнымі сродкамі.

Кіроўцы з глухатой змогуць працаваць на таксоўках, а анкалагічныя хворыя - кіраваць аўто ва ўсіх выпадках, акрамя тых, калі яны маюць патрэбу ў паліятыўнай дапамозе. У Міністэрстве аховы здароўя патлумачылі, што змянілася ў плане допуску да кіравання механічнымі транспартнымі сродкамі, піша tut.by.

Нагадаем, Міністэрства аховы здароўя пастановай ад 6 снежня 2018 года №88 устанавіла пералік захворванняў і супрацьпаказанняў, якія перашкаджаюць кіраванню механічнымі транспартнымі сродкамі, самаходнымі машынамі, а таксама ўмоў, пры выкананні якіх асобы дапускаюцца на падставе медыцынскiх паказанняў да кіравання.

Ірына Болдырава, кансультантка ўправы медыцынскай экспэртызы галоўнай управы арганізацыі медыцынскай дапамогі, экспэртызы, зваротаў грамадзян і юрыдычных асоб Міністэрства аховы здароўя, распавяла, што цяпер падыход да допуску да кіравання механічнымі транспартнымі сродкамі катэгорыі «В» стаў больш ліберальным. Пры гэтым пры атрыманні катэгорый «С» і «D» ён застаўся ранейшым, бо там ідзе гаворка пра бяспеку перавозкі грузаў.

Пры гэтым допуск да кіравання механічнымі транспартнымі сродкамі катэгорыі «В» будзе ажыццяўляцца без уліку «найму на працу». Гэта патрабаванне прыбралі.

Паводле пастановы цяжарныя з пасведчаннем кіроўцы катэгорыі «В», без абмежаванняў у тэрміне цяжарнасці змогуць кіраваць легкавымі аўтамабілямі. Раней гэта было забаронена з 30-га тыдня цяжарнасці.

Тэрмін дзеяння меддаведкі кіроўцы, як і раней, вар'юецца ад 1 года да 5 гадоў у залежнасці ад наяўнасці захворванняў у кіроўцаў. Пры гэтым пры пэўных захворваннях ён свой. Сам па сабе парадак агляду і праца камісій не змяніліся. Гэта значыць, ахвотны кіраваць аўтамабілем павінен атрымаць выпіску з паліклінікі па месцы жыхарства, а затым прайсці абследаванне ў кіроўчай камісіі, як і раней.

Пры некаторых захворваннях павялічаныя тэрміны пераагляду. Напрыклад, пры інфаркце міякарда раней гэта трэба было рабіць кожны год, цяпер - першыя два гады - штогод, а затым раз на два гады. Пры гэтым пасля інфаркту міякарда за стырно дапускалі праз год, цяпер з улікам стану - праз шэсць месяцаў.

Дакумент пашырае медыцынскiя паказанні для інвалідаў. Размова ў тым ліку ідзе пра людзей з парушэннямі функцыі апорна-рухальнага апарата. Цяпер яны змогуць працаваць на спецыяльнасцях кіроўцы. Гэта навіна таксама тычыцца і людзей з глухатой. Цяпер яны могуць працаваць таксістамі. Раней гэта было забаронена - нягледзячы на гэта, у онлайн-сэрвісах па пошуку машыны працуе нямала людзей з абмежаваннямі па слыху.

Пры гэтым людзі з двухбаковай глухатой раней праходзілі медагляд для катэгорыі «В» раз на два гады, цяпер будуць раз на паўтара.

Пры анкалагічных захворваннях раней людзі маглі кіраваць аўто толькі пасля лячэння і на падставе заключэння анколага і пры ўмове рэмісіі захворвання. Цяпер гэта магчымае ва ўсіх выпадках, акрамя IV клінічнай групы рака. Гаворка ідзе пра хворых, якія атрымліваюць паліятыўную дапамогу. Пры гэтым IV клінічная група не адно і тое ж, што IV стадыя рака.

У плане гледжання, са слоў Ірыны Болдыравай, перагледзелі моманты, звязаныя з палямі гледжання і тэрмінамі назірання пасля аператыўных умяшанняў. Пры гэтым змены неістотныя, бо захворванні, звязаныя са зрокам, могуць істотна паўплываць на бяспеку кіравання.

Пастанову апублікавалі на Нацыянальным прававым інтэрнэт-партале Беларусі 4 студзеня. Яна ўваходзіць у дзеянне праз 15 дзён пасля апублікавання.