24 студзеня 2021, Нядзеля, 15:58
Сім сім, Хартыя 97!
Рубрыкі

Чакаецца адстаўка міністра-камуніста Карпенкі?

22
Чакаецца адстаўка міністра-камуніста Карпенкі?
ІГАР КАРПЕНКА НА НАРАДЗЕ Ў КІРАЎНІКА ДЗЯРЖАВЫ Ў ПЫТАННЯХ РАЗВІЦЦЯ КРАІНЫ Ў ЛІЧБАВАЙ СФЕРЫ, 14 КАСТРЫЧНІКА. ФОТА БЕЛТА

Лукашэнка зноў сарваўся на міністра адукацыі.

Ігар Карпенка сутыкнуўся з новым узроўнем прэсінгу: цяпер яго крытыкуе не толькі Аляксандр Лукашэнка, але і набліжаныя да яго бізнэсоўцы, піша «Салідарнасць».

Увесь гэты год былы лідар беларускіх камуністаў раз за разам трапляе пад агонь крытыкі кіраўніка дзяржавы.

Спачатку Карпенка некалькі раз дасталася за змест школьных праграм, якія, на думку Лукашэнкі, з аднаго боку перагружаныя, а з другога - не арыентаваныя на практыку («Слухайце, паўкурса - чарвякі!»).

Пасля была вымова за трагедыю ў Стоўбцах і крытыка за рашэнне міністра ўвесці ў школах новыя пасады адказных за бяспеку («Не трэба пажар тушыць бензінам»).

Затым рушыў услед скандал у Гомелі, дзе на відэа знялі настаўніцу, якая нецэнзурна лаялася. Лукашэнка асабіста ўмяшаўся, абурыўшыся пастановай чыноўнікаў ад адукацыі звольніць педагога.

І вось дыктатар зноў выказаў незадаволенасць працай міністра. Як вынікае з допісу IT-бізнэсоўца Віктара Пракапені пра ўдзел у нарадзе 14 кастрычніка, «прэзідэнт» падкрэсліў, што ў адукацыі бардак, і, калі гэта не будзе выпраўлена, то хутка ў міністэрстве адукацыі будзе новы міністр».

Словам Пракапені можна верыць, у тым ліку, таму, што гэта не першая пагроза Лукашэнкі ў дачыненні да Карпенкі. Яшчэ ў пачатку года кіраўнік дзяржавы казаў, што трэба «вельмі сур'ёзна» заняцца адукацыяй і «калі міністр гэтага не зразумеў, значыць, ён не міністр».

Цяпер сітуацыя для Карпенкі яшчэ больш пагоршылася, бо з уплывовых людзей яго крытыкуе не толькі Лукашэнка, які часам можа сарвацца на кім заўгодна. Але яшчэ, як мінімум, IT-бізнэсоўцы, да прапаноў якіх кіраўнік дзяржавы, як правіла, прыслухоўваецца.

Да таго ж гучыць не агульная крытыка, у Пракапені ёсць канкрэтны план змяненняў у сферы адукацыі.

Чакаецца, што ў хуткім часе на чале з Лукашэнкам адбудзецца нарада пра механізмы ўдасканалення ў сістэме. Сімвалічна, што ў гэтым трывожным чаканні пры заходзе на сайт міністэрства вісіць папярэджанне: «Сэрвіс часова спынены. Праводзяцца тэхнічныя працы».