Урад прызнаўся, што нафта «заваліла» экспарт і ён прадаўжае тармазіць

Хто адказны за гэта?

Беларусь праз падатковы манеўр і забруджаную расейскую нафту недаатрымала ў экспартнай праграме блізу $1,5 млрд, пра гэта сёння заявіў Сяргей Румас на пасяджэнні прэзідыума савета міністраў. Таксама ён адзначыў, што экспарт не дасягнуў узроўню аналагічнага перыяду мінулага года, піша onliner.by.

«Сітуацыя за восем месяцаў няпростая і не можа нас задавальняць. Экспарт не дасягнуў узроўню аналагічнага перыяду мінулага года, тэмп росту - 96,9%. Шмат пытанняў да міністраў, губернатараў, сур'ёзна недапрацоўвае Міністэрства замежных спраў і кіраўнікі замежных устаноў», - адзначыў Румас.

Калі ачысціць экспарт тавараў ад нафтавай групы, тэмп росту складае 100,9%, але, на думку прэм'ер-міністра, гэта не павінна служыць заспакаеннем, паведамляе прэс-служба савета міністраў.

Учора былі атрыманы папярэднія вынікі працы эканомікі за 9 месяцаў - рост запавольваецца.

- І гэта нягледзячы на дзяржаўную падтрымку і запэўніванні кіраўнікоў міністэрстваў пра тое, што зацверджаныя планы будуць выкананыя. Калі няма вытворчасці, як можа расці экспарт? Гэта ж узаемазвязаныя пытанні. Кіраўнікі павінны несці адказнасць за свае словы і абавязацельствы, - падкрэсліў кіраўнік урада.

Не ўдаецца размеркаваць пароўну экспартныя пастаўкі паміж ЕАЭС, ЕЗ і іншымі краінамі. Павялічылася доля ЕАЭС, асела доля Еўрапейскага Звязу. Тут вялікі ўплыў нафты, асабліва ў частцы еўрапейскага рынку, аднак гэта не адзіная прычына, адзначыў Сяргей Румас.

Кіраўнік урада падкрэсліў, што ў развязанні задачы дыверсіфікацыі краінай экспарту найважнейшая роля адводзіцца замежным установам. Аднак з 57 у 37 замежных установах не выконваюцца даведзеныя заданні ў экспарце тавараў, у 15 - другі год запар.

У снежні пройдзе нарада, на якой саўмін прааналізуе ўсе абяцанні, дадзеныя кіраўнікамі дзяржаўных органаў і прадпрыемстваў на пасяджэннях ва ўрадзе, з ацэнкай дзеянняў гэтых кіраўнікоў.

На мінулым тыдні з'явіўся прагноз развіцця беларускай эканомікі ад экспэртаў Сусветнага банка. Ён таксама не вельмі вясёлы.