З душой у Расеі толькі крадуць

Над краінай навіс цень «высакароднага разбойніка» Дуброўскага.

Найлепшая гісторыя ўчорашняга дня: магнітагорскім чаргавікам, якія чакаюць рассялення з састарэлага і аварыйнага жылля, выдалі назіральныя талоны на кватэры ў доме, пацярпелым 31 снежня 2018 года ад выбуху. Паводле афіцыйнай версіі – газу, паводле неафіцыйнай – тэракту, які ўлады з нейкіх прычынаў надумалі замоўчаць.

Цяпер на месцы двух узарваных пад'ездаў – сквер, у астатніх – жывуць людзі. Але вярнуцца захацелі не ўсе, гэтыя свабодныя кватэры, мабыць, прапануюць чаргавікам.

Папярэдні чалябінскі губернатар Дуброўскі, які даў лататы, прыхапіўшы, паводле версіі следства, 20 млрд руб., абураўся жыхарамі, называючы іх патрабаванні поўнага рассялення дома «скокамі на костках». Чэрствага Дуброўскага вясной знялі, паставілі маладога тэхнакрата Тэкслера. Але ён заняты: чысціць каманду Дуброўскага і разбірае завалы.

Ну, самі падумайце, ці справа губернатару да паўабрынутага дома, цi да таго, у якія змрочныя дамы перасяляюць адтуль простых людзей, калі трэба расчысціць хлебныя месцы ад чужых і пасадзіць на іх сваіх? Нейкае струпехлае жыллё? У якім-такім Магнітагорску? Нецікава.

Таму абураныя жыхары і б'юць чалом не Тэкслеру, а адразу Пуціну. На цара апошняя надзея!

Цар учора, дарэчы, зноў адліў у метале: хто, кажа, з чыноўнікаў не гатовы працаваць «з душой і з сэрцам... не туда патрапіў», і лепш ім шукаць іншую працу.

У такім выпадку Пуцін можа ўжо сёння звальняць усіх. Ягоныя чыноўнікі толькі крадуць з душой. Нават прадаўшы адну толькі кватэру Дуброўскага за 0,5 млрд рублёў у Крамля, можна сардэчна развязаць кватэрныя пытанні немалога ліку ягоных былых землякоў. Пра размах Тэкслера традыцыйна даведаемся ўжо пасля ягонай адстаўкі. Але маскоўская кватэрка за $ 1 млн, запісаная на жонку, ёсць і ў яго.

Зрэшты, і сам Пуцін клопат пра людзей уключае пры нагодзе. Як сёння на нарадзе пра дапамогу пацярпелым ад паводкі ў Іркуцкай вобласці. І, баімся, што з гэтай дапамогай будзе гэтак сама, як з рассяленнем узарванага дома. Увесну Пуцін таксама загадаў гэтае пытанне развязаць і абяцаў трымаць яго на кантролі.

Мы вось і бачым: засяленне замест рассялення.

Тэлеграм-канал «СерпомПо»