У Гародні выбухнуў страйк таксістаў

Для яго выбралі самы «пікавы» для горада час.

Блізу 30 таксі прыехалі сёння на стаянку каля гіпермаркета «Карона» для пратэсту. Час быў выбраны самы пікавы для горада – з 7 да 9-й раніцы. Кіроўцы не прымалі заказы, тым самым блакуючы працу таксі. Перавознікі незадаволеныя нізкімі тарыфамі, дрэннымі ўмовамі працы і мізэрнымі заробкамі. Ад страйку чакаюць узняцця тарыфаў і ўрэгулявання рынку перавозак, паведамляе сайт s13.ru.

– Усе новыя агрэгатары, якія прыйшлі на рынак – «Яндэкс», «Максім», сярод іншага, першапачаткова прапаноўвалі нядрэнныя ўмовы для кіроўцаў, потым усё станавілася горш і горш. Першапачаткова мінімальны заказ для кіроўцы быў 3.5 рубля, то-бок калі кошт заказу быў меншы, Яндэкс даплачваў. Цяпер увогуле прыбралі ўсе даплаты, і стала нявыгадна вазіць, – апавядае s13.ru кіроўца Сяргей.

Мужчына прыйшоў у службу таксі ў студзені сёлета. І ўвесь гэты час працаваць даводзіцца ў такіх умовах.

– Каб выжываць, трэба працаваць 16 гадзінаў у суткі. Калі працуеш на «заробкавай» машыне, то за 12 гадзінаў можна зарабіць рублёў 25. У каго машына свая, то лепей, – кажа пра сваю працу Сяргей. – Але не варта забывацца, што калі рэгістраваць машыну менавіта ў якасці таксі, заробак зніжаецца, адсюль і куча «чорных». А калі гэта арэнда, то хлопцы ездзяць і 16 гадзін, толькі каб не «патрапіць» на грошы і нешта прывезці дадому.

Паездка на таксі сёння стала больш, чым даступнай. Адлегласць да 4 кіламетраў можна праехаць за 2.5 рубля. Калі ехаць сям'ёй з 4 чалавек, гэта танней, чым на маршрутным таксі і нават на аўтобусе.

– Агрэгатары павыціскалі ўсіх спачатку сваімі «вабнотамі», і цяпер людзі працуюць літаральна за хлеб, а яны – «Яндэкс», «Максім» – сталі манапалістамі на рынку. Вось і хочам, каб нас пачулі, – тлумачыць пазіцыю таксістаў Сяргей. – Ад страйку чакаем узняцця тарыфаў, каб пра гэта загаварылі, у тым ліку і на дзяржаўным узроўні. Час або вяртаць ліцэнзіі, або неяк рэгуляваць рынак троху.