Бабіна лета ў Беларусі будзе прадоўжыцца да 22 кастрычніка

Надвор'е б'е рэкорды.

Калі ў панядзелак, 14 кастрычніка, былі бітыя тэмпературныя рэкорды 1993 года, у аўторак - 1979-га, а ў сераду аж 1907 года! У Менску 16 кастрычніка абнавіўся тэмпературны рэкорд 112-гадовай даўніны, устаноўлены ў 1907 годзе: 20,2 градуса супраць 20, піша kp.by.

Кліматычная норма была перавышаная на 7 - 10 градусаў. Гэта ўвяло народ у замяшанне. Нехта ішоў па вуліцы ў майцы і шортах, а хтосьці ні за што не хацеў расставацца з цёплай курткай і шалікам.

- У панядзелак на многіх метэастанцыях, у асноўным у цэнтральнай і паўночнай частцы краіны, былі перавышаныя абсалютныя максімумы тэмпературы паветра для гэтага дня. У аўторак тэмпературны фон быў вельмі высокім на паўднёвым захадзе. У Берасці тэмпература паветра паднялася да 24,4 градуса і перавысіла рэкорд дня на 1 градус. Так што ў нас устанавілася анамальна цёплае надвор'е, - сказалі ў Белгідрамеце.

Тэмпературныя рэкорды пачатку тыдня былі агулам на адзін-два градусы вышэйшымі за папярэднія. У панядзелак новыя максімумы дня зафіксавалі на 30 метэастанцыях, у аўторак - на 18, а ў сераду - на 25.

Між тым сказаць, што гэта самы цёплы кастрычнік у гісторыі назіранняў, нельга, бо тэмпература ў першай дэкадзе месяца была ўсяго на некалькі дзясятых вышэйшай за норму, а другая дэкада месяца не скончылася, і паводле некалькіх рэкордных дзён высновы рабіць рана. Але мы верым, што кастрычнік і не на такое здольны. І галоўнае - бабіна лета адбылося!

Сіноптыкі адзначаюць, што сухое і цёплае надвор'е захаваецца яшчэ да аўторка, 22 кастрычніка. А ў найбліжэйшы чацвер у паўночнай частцы краіны чакаюцца кароткачасовыя дажджы. Але, нягледзячы на гэта, паветра па-ранейшаму застанецца цёплым. А потым зноў вернецца сонечнае летняе надвор'е. У нядзелю і панядзелак на поўдні Беларусі прагназуюць да 23 градусаў цяпла.

- А вось у аўторак надвор'е будзе мяняцца, чарговы атмасферны фронт месцамі па краіне выкліча кароткачасовыя дажджы. Але ападкаў будзе няшмат. Адзінае, што за гэтым фронтам пачне паступаць больш халоднае паветра. Ночы будуць яшчэ цёплыя - ад +5 да 12, а ўдзень у рэспубліцы стане крыху халадней: ад +7 да +14 градусаў, а на поўдні ад +14 да +19 градусаў, - адзначыў сіноптык, дадаўшы, што і пасля пахаладання надвор'е застанецца досыць цёплым для другой паловы восені. Далей спецыялісты загадваць не бяруцца.