Банкі гуляюць з грашыма беларусаў у рулетку

Адгадаеш - будзе добра. Не адгадаеш - будзе вельмі балюча.

Беларускія банкі ўсё яшчэ прапануюць прывабныя дэпазіты ў айчынных рублях, пры гэтым не прапаноўваючы практычна ніякага даходу за ўклад у валюце. Што выбраць у гэтай сітуацыі, «Салідарнасць» запыталася ў старэйшага аналітыка «Альпары» Вадзіма Іёсуба.

Некаторыя беларускія банкі прапануюць тэрміновыя дэпазіты ў беларускіх рублях пад 12% гадавых. Прапанова прывабная, але ці не абясцэніцца айчынная валюта за гэты перыяд?

- Калі захаваюцца тыя падыходы і тая палітыка, якія цяпер праводзяць Нацбанк і эканамічны блок урада, то рублю нічога пагражаць не павінна, - мяркуе Вадзім Іёсуб. - З улікам таго, што год перадвыбарчы, тэарэтычна нельга цалкам адкідаць імавернасць прыняцця папулісцкіх пастаноў на самым высокім узроўні. Але нават калі да прэзідэнцкіх выбараў пачнуць актыўна нарошчваць заробкі або крэдытаваць прадпрыемствы, то негатыўныя наступствы наступяць пазней.

У той жа час беларускія банкі прапаноўваюць на дэпазітах у далярах ЗША менш за 1% гадавых. Ці ёсць сэнс трымаць зберажэнні ў гэтай валюце?

- Калі разглядаць выключна прыбытковасць, то з эканамічнага пункту гледжання няма вялікай розніцы: трымаць валюту дома пад падушкай без адсоткаў або трымаць у банку пад 1% гадавых (калі ў вас няма мільёна даляраў). Можна толькі сказаць, што ў банку быццам бы неяк бяспечней трымаць, - адзначыў Іёсуб. - Калі параўноўваць рубель і даляр, то магу адзначыць наступнае: наяўны даляр - гэта цікавей, чым наяўны беларускі рубель. Але рубель на дэпазіце пераважае, чым даляр.

Старэйшы аналітык «Альпары» нагадаў, што ў кожным выпадку варта прытрымлівацца прынцыпу дыверсіфікацыі і не захоўваць усе зберажэнні ў адной валюце - нават калі на сёння яна здаецца выгаднай:

- Я парэкамендаваў бы зрабіць так: адну палову трымаць у беларускіх рублях - на дэпазіце пад максімальна магчымую стаўку. А другую падзяліць паміж далярам і еўра - з улікам нізкіх ставак гэта ўжо справа густу, ці трымаць іх на дэпазіце або захоўваць у наяўным выглядзе.

Яшчэ раз паўтаруся: можна колькі заўгодна думаць, якая валюта будзе самай моцнай і расці, але не варта ўсе свае зберажэнні пералічваць у адну.

Адгадаеш - будзе добра. Не адгадаеш - будзе вельмі балюча.