Сілуанаў: Пастановы пра крэдыт Лукашэнку, можа, і не будзе

Першы віцэ-прэм'ер РФ звязаў выдачу крэдыту правадыру з ходам інтэграцыі дзвюх краін.

Першы віцэ-прэм'ер, міністр фінансаў РФ Антон Сілуанаў заявіў журналістам, што пытанне аб выдачы Беларусі крэдыту сумай 600 млрд руб пакуль не разгледжанае, паведамляе ТАСС.

«Не разгледжанае пакуль. Наконт Беларусі «дарожную карту» адпрацоўваем цяпер. У нас жа задача ў рамках зацверджанай прэм'ерам «дарожнай карты» са сваімі раздзеламі адпрацоўваць больш дэталёвыя планы», - сказаў Сілуанаў.

«Яе [пастановы аб гэтым крэдыце], можа, і не будзе», - цытуе першага віцэ-прэм'ера, у сваю чаргу, агенцтва «Інтэрфакс».

Са слоў кіраўніка Мінфіна РФ, выдача грошай Менску залежыць і ад таго, як краіны «будуць рухацца на інтэграцыйным трэку».

Беларусь - найбольш завінавачаная Расеі. На 1 ліпеня 2019 года яе завінавачанасць складала $7,55 млрд.

У канцы лютага Беларусь папрасіла ў Масквы крэдыт на выплату пазыкі. Як паказваў тады Сілуанаў, Менск разлічваў атрымаць $ 1 млрд, уключыўшы ў гэтую суму пазыкі як перад Расеяй, так і перад Еўразійскім фондам стабілізацыі і развіцця.

У красавіку кіраўнік Мінфіна паведаміў, што Пуцін пагадзіўся на ідэю даць Менску крэдыт сумай $600 млн. Гаворка ішла пра абмеркаванне працэдур, неабходных для падпісання адпаведнага дакумента. Аднак улетку Беларусь грошай так і не атрымала і папрасіла крэдыт у Кітая, а таксама правяла размяшчэнне аблігацый у рублях на расейскім рынку. Кітай - другі найбуйнейшы крэдытор Беларусі, пасля Расеі.