Лукашэнка: У гноі целяпаюцца цяляты, побач міністры ходзяць

Дыктатар распавёў пра свае метады кіравання.

Падчас наведвання Акадэміі кіравання Лукашэнка зноў успомніў сваё сакавіцкае наведванне фермы з «абас...мі каровамі» на Магілёўшчыне, паведамляе tut.by.

- У гноі целяпаюцца цяляты, побач міністры ходзяць. А я пайшоў не туды, куды яны хацелі мяне завесці, - а там яшчэ горш! Калі ты бачыш гэту няшчасную жывёлу... Яна ж бездапаможная - з чалавечага пункту гледжання, а з пункту гледжання эканомікі - гэта велізарная шкода. У нас 85 тысяч [галоў] за мінулы год пала маладняку. Гэта вялікія грошы...

Вось звольніў міністра, віцэ-прэм'ера. Потым думаю: у іх жа вось гэты бок мацнейшы, дай-ка я іх туды, у гэты г... але, і адпраўлю. Нядаўна я да іх паслаў з іншых абласцей людзей. Кажу: ідзіце, паглядзіце, як трэба рабіць. І так, як яны там разгарнуліся, калі так у кожнай вобласці будзе, мне напалову менш працы...

Нагадаем, 26 сакавіка Аляксандр Лукашэнка наведваў малочна-таварны комплекс «Сліж» ААТ «Амкадор-Шклоў», які ўваходзіць у структуру аграхолдынга «Купалаўскае». Пасля дакладаў дыктатар вырашыў асабіста азнаёміцца з умовамі ўтрымання буйной рагатай жывёлы і станам вытворчых памяшканняў.

Паводле вынікаў агляду Лукашэнка зладзіў прама на ферме разнос - «Ты паглядзі на гэтую скаціну! Яна ж уся абоср...ная, на поўсці закарэла ўсё», - і свае пасады страцілі губернатар Магілёўскай вобласці Уладзімір Даманеўскі, старшыня Шклоўскага райвыканкама Васіль Віцюнаў і памочнік Лукашэнкі ў Магілёўскай вобласці Генадзь Лаўранкоў.