Колькі ў Беларусі каштуе апрануць дзіця на зіму

Сума несувымерная з памерам дзіцячай дапамогі.

Каб халады не засталі знянацку, многія мамы загадзя набываюць зімовую вопратку для сваіх маленькіх дзяцей. У крамах і на рынках ужо на ўсю моц прадаюцца цёплыя курткі, камбінезоны і абутак.

Колькі сёлета каштуе апрануць дзіця ясельнага веку на зіму? Ці сувымерная гэтая сума з памерам дзіцячай дапамогі? Разам з маладой мамай з Віцебска «Віцебскі кур'ер» падлічыў кошт неабходных набыткаў.

Такім чынам, трэба набыць зімовую куртку, уцеплены паўкамбінезон, абутак і галаўны ўбор на дзяўчынку двух гадоў. Дзе гэта можна зрабіць?

Ёсць як мінімум тры варыянты. Самы дарагі – у спецыялізаваных крамах для дзяцей, самы танны – б/у камплект паводле аб'яваў у інтэрнэце, адносна дэмакратычны – на рынку.

Выбар зімовага адзення для дзяцей на рынку немаленькі, а кошты ва ўсіх кропках прыблізна аднолькавыя. Троху танней каштуюць балоневыя варыянты, троху даражэй – камплекты з мембраннай тканіны. Што тычыцца абутку, то дуцікі, валёнкі і чаравікі прадаюцца практычна з адным коштам.

Колькі давядзецца выдаткаваць бацькам?

Куртка на двухгадовую дзяўчынку – ад 50 да 75 рублёў.

Паўкамбінезон уцеплены – ад 20 да 30 рублёў.

Камплект (куртка + штаны) – 75–100 рублёў.

Абутак – 25–35 рублёў.

Шапка – 10–15 рублёў.

Усяго (вельмі у сярэднім) – 125 рублёў.

Для параўнання ў адной з спецыялізаваных дзіцячых крамаў камплект (куртка + паўкамбінезон) – ад 150 рублёў + абутак ад 70 рублёў. Усяго (як мінімум) – 220 рублёў.

– Многія мамы, каб зэканоміць, набываюць для сваіх дзетак адзенне б/у, – пракаментавала маладая мама з Віцебска Таццяна. – Аб'яваў у інтэрнэце вельмі шмат, большасць варыянтаў – у выдатным стане. Гэта і зразумела. Маляты хутка растуць, таму часта камплект, які быў вялікі гэтай зімой, налета будзе ўжо малы. Б/у куртку і паўкамбінезон можна набыць за 35–50 рублёў. З недахопаў гэтага варыянту – паводле аб'яваў трэба ездзіць у розныя канцы горада, каб прымерыць вопратку. Без аўтамабіля гэта не вельмі зручна.

Памер дапамогі на першае дзіця ў Беларусі сёння складае 376 рублёў. Калі з іх выдаткаваць 125 рублёў на набыццё зімовай вопраткі і абутку на рынку, то застанецца 250 рублёў на астатнія патрэбы малога.

Што ж атрымліваецца? Дзіцячай дапамогі, каб набыць зімовую вопратку і абутак для дзіцяці, хопіць. Але вось ці дастаткова будзе рэшты сродкаў, каб пражыць пасля гэтага месяц?