У Казахстане пашырылі паўнамоцтвы Назарбаева
3- 21.10.2019, 13:42
- 12,090
Падпісаны спецыяльны ўказ.
Прэзідэнт Казахстана Касым-Жамарт Такаеў падпісаў указ, які пашырае паўнамоцтвы былога кіраўніка дзяржавы Нурсултана Назарбаева ў сферы кадравай палітыкі, паведамляе «Радыё Свабода».
Назарбаеў, які ўзначальваў Казахстан больш за 30 гадоў, сышоў у адстаўку ў сакавіку, але захаваў шматлікія важныя паўнамоцтвы, у тым ліку - пасады кіраўніка Рады бяспекі і лідара кіроўнай партыі «Нур Атан».
Згодна з указам, прызначэнне міністраў, за выключэннем кіраўнікоў МЗС, Мінабароны і МУС, з гэтага часу праводзіцца прэзідэнтам пасля ўзгаднення са старшынём Савета бяспекі. Акрамя таго, згодна з тэкстам указа, прызначэнне кіраўнікоў органаў, непасрэдна падпарадкаваных і падсправаздачных прэзідэнту Казахстана, таксама павінна быць узгодненае з кіраўніком Савета бяспекі краіны. Да іх, напрыклад, належаць адміністрацыя прэзідэнта, генеральная пракуратура, камітэт нацыянальнай бяспекі, Нацыянальны банк, рэспубліканская гвардыя, служба замежнай выведкі, служба аховы прэзідэнта. Разам з гэтым узгадненне з Назарбаевым цяпер неабходнае для прызначэння кіраўнікоў адміністрацый абласцей, гарадоў рэспубліканскага значэння і сталіцы Казахстана.
Назарбаеў, якому сёлета споўнілася 79 гадоў, займаў пасаду прэзідэнта Казахстана з красавіка 1990 года.
У 2015 годзе на датэрміновых выбарах ён быў пераабраны на пяты прэзідэнцкі тэрмін. 19 сакавіка 2019 года ён абвясціў аб адстаўцы.
У 2018 годзе Назарбаеў атрымаў магчымасць пажыццёва кіраваць Саветам бяспекі Казахстана. Адзначалася, што такім чынам кіраўнік дзяржавы спрабуе захаваць уладу пасля сыходу з прэзідэнцкай пасады. У Казахстане падтрымліваўся культ асобы Назарбаева, яму быў прысвоены тытул Елбасы - «лідара нацыі».
Назарбаева неаднаразова абвінавачвалі ў падаўленні іншадумства, злоўжываннях уладай, падаўжэнні паўнамоцтваў праз недэмакратычныя працэдуры.