Ліберальная партыя Трудо ў лідарах на выбарах у парламент Канады
- 22.10.2019, 9:39
- 4,961
Для фармавання большасці прэм'еру краіны патрэбная перамога мінімум у 170 акругах.
У Канадзе ў панядзелак, 21 кастрычніка, прайшлі выбары ў Палату супольнасцяў парламента. Пасля апрацоўкі пратаколаў на 96 адсотках участкаў Ліберальная партыя Канады дзейнага прэм'ер-міністра Джасціна Трудо ў лідарах у 156 акругах з 338, гаворыцца ў папярэдніх выніках выбарчай камісіі краіны, паведамляе dw.com.
Найбліжэйшы спаборнік лібералаў, Кансерватыўная партыя Канады, атрымлівае большасць у 122 акругах. На трэцім месцы размяшчаецца "квэбэкскі блок", які лідаруе ў 32 акругах, на чацвёртым – Новая дэмакратычная партыя (24 акругі). Астатнія партыі атрымліваюць большасць у 4 акругах, набіраючы ў суме 8,8 адсотка галасоў. Лібералы атрымалі 33 адсоткі галасоў, кансерватары – 34,5 адсотка, "квэбэкскі блок" – 7,9 адсотка, а новыя дэмакраты 15,9 адсотка.
Яўка паводле папярэдніх звестак склала 62,95 адсотка выбарнікаў. Блізу 27 млн чалавек маглі скарыстаць сваё выбарчае права.
Чальцоў Палаты супольнасцяў канадскага парламента абіраюць на 4 гады на прамым усеагульным галасаванні паводле мажарытарнай сістэмы. Чальцоў верхняй палаты, Сената, прызначае генерал-губернатар паводле рэкамендацыі прэм'ер-міністра.
На выбарах 2015 года лібералы атрымалі 184 мандаты, а кансерватары – 99 мандатаў. Для фармавання большасці ў ніжняй палаце парламента Канады неабходна атрымаць перамогу не менш як у 170 акругах.