СБУ затрымала экс-намесніка міністра эканомікі Украіны
13- 22.10.2019, 15:34
- 14,959
Яго падазраюць у дзяржаўнай здрадзе.
У аўторак, 22 кастрычніка, Служба бяспекі Украіны затрымала экс-намесніка міністра эканомікі паводле падазрэння ў дзяржаўнай здрадзе.
Пра гэта паведамляе «Новое время» са спасылкай на прэс-цэнтр СБУ.
Следчыя СБУ ўстанавілі, што чыноўнік Міністэрства эканамічнага развіцця і гандлю Украіны, чыноўнікі дзяржпрадпрыемства «Украінскі цэнтр «Бяспека» і дзяржаўнай акцыянернай холдынгавай кампаніі «Арцём» дзейнічалі насуперак інтарэсам Украіны на карысць замежнай кампаніі.
«Яны ўклалі з замежнікамі загадзя стратны кантракт на выраб і пастаўку лініі вытворчасці артылерыйскіх набояў на агульную суму, большую за 16,5 млн даляраў ЗША», - заявілі ў канторы.
У выніку незаконнай угоды авансавая выплата ў суме, большай за 8,2 мільёна даляраў, была пералічаная на рахункі фіктыўных афшорных прадпрыемстваў і прысвоеная ўдзельнікамі схемы.
Пры гэтым замежная кампанія абсталяванне ва Украіну не пастаўляла. Дзеянні зламыснікаў паставілі пад пагрозу забеспячэнне Узброеных Сіл боепрыпасамі падчас процідзеяння расейскай агрэсіі.