Настаўніца з беларускага аграгарадка здабыла грант Google
3- 23.10.2019, 12:30
- 12,890
Каліфарнійскі ІТ-гігант вылучыў праект менавіта беларускай выкладчыцы інфарматыкі.
Адзіная ў краіне настаўніца са школы ў Негарэлым (Менская вобласць) атрымала грант Google. Яна здабыла 3,5 тысячы еўраў, паведамляе dev.by.
На грант падавалі заяўкі педагогі з Салігорска, Барысава, а таксама Асацыяцыя «Адукацыя для будучыні». Але каліфарнійскі ІТ-гігант вылучыў праект менавіта Людмілы Рыбчынскай - выкладчыцы інфарматыкі з 16-гадовым стажам з Негарэльскай школы, дзе вучыцца 484 школьнікі з найбліжэйшых вёсак.
У размове з журналістамі Людміла распавяла, што старэйшым класам яна тлумачыць сістэмы хмарных сэрвісаў, вэб-канструктараў накшталт WordPress, Wix. Ейныя вучні ўжо рабілі сайт для школьнай бізнэс-кампаніі для продажу дрэў. Васьмікласнікі вывучаюць з ёй Python. «Шмат заданняў запазычваем на адукацыйнай платформе Stepik. Таксама ў мяне ёсць свой онлайн-курс пра электронныя табліцы», - падзялілася Рыбчынская.
Ліст ад Google, дарэчы, прыйшоў зусім просты: «Вы запрошаны да ўдзелу ў еўрапейскі Тыдзень кода. Калі хочаце, скарыстайцеся грантам».
Куды выдаткуюць грошы?
Са слоў дырэктаркі школы, 3,5 тысячы еўра ўжо залічылі на рахунак школы, толькі скарыстацца імі пакуль не ўдалося: грошы праходзяць рэгістрацыю ў дэпартаменце. Крыху пазней іх накіруюць на адукацыйныя мерапрыемствы, заробак Людмілы Рыбчынскай, прызы дзецям, ПА, канструктары Lego, каляровы прынтар. «Мы будзем весці справаздачнасць, каб было відаць, што грошы выкарыстоўваюцца паводле мэтавага прызначэння, і ніхто іх не паклаў у свае кішэні», - запэўніла дырэктарка.
Акрамя таго, як патрабуе грант, пажадана, каб грошы мінімальна ўклалі ў тэхніку і больш у адукацыйныя працэсы. З гэтай прычыны ў Негарэлым правялі Тыдзень кода, які цягнуўся аж два тыдні. Тут ладзілі турніры, адкрытыя ўрокі, стваралі кампутарныя гульні на Scratch, вывучалі асновы праграмавання на Python і прэзентавалі ўласныя праекты.