«Няма чым дыхаць»: Апошнія словы 39 мігрантаў, знойдзеных у фуры ў Англіі

Акрамя грамадзянаў Кітая, у грузавіку маглі знаходзіцца в'етнамцы.

Сама менш трое з 39 чалавек, якія загінулі ў грузавіку ў ангельскім графстве Эсэкс, верагодна, былі з В'етнама.

Бі-бі-сі стала вядома пра трох нараджэнцаў гэтай краіны, якія, як мяркуюць іх сваякі, маглі знаходзіцца ў грузавіку.

Сваякі самі звязаліся з журналістамі Бі-бі-сі.

У аўторак 26-гадовая Фам Тхі Ча Мі напісала бацькам, што задыхаецца. Пасля гэтага на сувязь яна больш не выходзіла.

Сваё апошняе паведамленне яна адправіла ў 22.30 у аўторак – за дзве гадзіны да прыбыцця кантэйнера ў брытанскі Пурфліт з Зэбруге ў Бельгіі.

Брат Фам Тхі Ча Мі апавёў, што яна заплаціла 30 тыс. фунтаў (38 тыс. даляраў), каб яе пераправілі ў Брытанію. Вядома, што перад знікненнем яна знаходзілася ў Бельгіі.

«Мая сястра знікла 23 кастрычніка. Яна ехала з В'етнама ў Брытанію. Мы не можам з ёй звязацца. Мы непакоімся, што яна знаходзілася ў тым кантэйнеры. Мы звяртаемся да брытанскай паліцыі з просьбай правесці расследаванне, каб маю сястру вярнулі сям'і», – сказаў ён.

Сваякі 26-гадовай в'етнамскай дзяўчыны паказалі апошнія паведамленні, якія яна адправіла сваім бацькам.

«Мне вельмі, вельмі шкада, мама і тата, што мая паездка ў іншую краіну скончылася няўдачай. Я паміраю, мне няма чым дыхаць. Я вельмі вас люблю, мама і тата. Мама, мне вельмі шкада», – напісала яна.

Брат Фам Тхі Ча Мі апавёў Бі-бі-сі, што яна адправілася ў Брытанію 3 кастрычніка. Яна сказала сваякам не спрабаваць з ёй звязацца, паколькі «арганізатары» яе пераезду забаранілі ёй адказваць на званкі.

«Яна паляцела ў Кітай, дзе знаходзілася два дні, а потым паехала ў Францыю. Яна тэлефанавала нам з кожнай краіны. Першы раз яна паспрабавала перасячы мяжу Брытаніі 19 кастрычніка, але яе злавілі і адправілі назад. Не ведаю, у якім порце гэта адбылося», – апавёў ён.

Бі-бі-сі таксама вядома яшчэ пра дваіх зніклых грамадзянаў В'етнама – 26-гадовага мужчыну і 19-гадовую дзяўчыну. Кантрабандысты, як мяркуецца, вярнулі заплачаныя ім грошы сваякам загінулых.

Брат 19-гадовай в'етнамкі патэлефанаваў ёй у аўторак у 07.20 паводле бельгійскага часу. Яна сказала, што садзіцца ў кантэйнер і збіраецца адключыць тэлефон, каб пазбегнуць выяўлення. Пасля гэтага на сувязь яна больш не выходзіла.

Паводле ягоных словаў, кантрабандысты вярнулі грошы сям'і на наступны дзень. Таксама грошы вярнулі сям'і 26-гадовай дзяўчыны.

Паліцыя знайшла целы 31 мужчыны і васьмі жанчынаў у грузавіку, прыпаркаваным у прамысловай зоне гарадка Грэйс графства Эсэкс у ноч на сераду.

Спачатку следчыя выказалі здагадку, што ўсе, хто быў у грузавіку, – грамадзяне Кітая.

Кіроўцу затрымалі паводле падазрэння ў забойстве. Гэта 25-гадовы ірландзец Мо Робінсан.