Трампу даслалі абломак Берлінскага мура масай 2,7 тоны

Жыхары горада пакінулі на ім свае пажаданні прэзідэнту ЗША.

Група берлінскіх актывістаў даслала прэзідэнту ЗША абломак Берлінскага муру да 30-годдзя яго падзення, нагадаўшы аб тым, што ЗША дапамагалі будаваць свет без муроў.

Пра гэта піша «Еўрапейская праўда» са спасылкай на Newsweek.

Абломак мура масай 2,7 тон прыбыў у Вашынгтон у суботу. Яго даслала берлінская няўрадавая арганізацыя Die Offene Gesellschaft у адказ на ініцыятыву Дональда Трампа пабудаваць мур на мяжы з Мексікай.

Падпісаны «грамадзянамі Берліна» абломак мура змяшчае тэкст, які адзначае, што «ніводны мур не існуе вечна».

«Мы хацелі б перадаць вам адзін з кавалкаў зрынутага Берлінскага мура, каб адзначыць адданасць Злучаных Штатаў пабудаванню свету без муроў», - гаворыцца ў тэксце, выведзеным на абломку. Тэкст таксама падкрэслівае, што ЗША гадамі рабілі ўсё, каб дапамагчы зруйнаваць Берлінскі мур.

Фрагмент муру транспартавалі ў Вашынгтон за кошт прыватных ахвяраванняў.

Сакрэтная служба, зрэшты, адмовілася прыняць «падарунак» берлінскіх актывістаў.

Яшчэ да адмовы ў арганізацыі выказалі надзею, што частку мура размесцяць у публічным месцы, каб амерыканцы змаглі прачытаць выведзены на ім тэкст.

9 лістапада ў Берліне прайшлі святочныя мерапрыемствы, прысвечаныя 30-годдзю падзення Берлінскага муру, што стала пачаткам аб'яднання краіны.

З нагоды святкавання 30-й гадавіны падзення Берлінскага мура канцлерка Нямеччыны Ангела Мэркель заклікала Еўропу абараняць свабоду і дэмакратыю, якія ўсё больш зазнаюць напад.