Украінскія ВМС выпрабавалі катэры Island, якія прыбылі з ЗША

Пасля заканчэння выпрабаванняў яны будуць уключаныя ў склад Вайскова-марскіх сіл Узброеных сіл Украіны і пачнуць дзяжурства.

9 лістапада ў Адэсе вайскоўцы Вайскова-марскіх сіл Украіны выпрабавалі патрульныя катэры Island Р190 «Славянск» і Р191 «Старабельск», якія былі перададзеныя ЗША. Пра гэта паведамляе прэс-служба ВМС Украіны на сваёй старонцы ў Facebook, піша gordonua.com.

«Усе мерапрыемствы ў падрыхтоўцы і прыёме катэраў, падрыхтоўцы экіпажаў і падрыхтоўцы да выхаду ў мора выкананыя цалкам. На прыкладзе падрыхтоўкі экіпажаў катэраў тыпу Island мы будзем рыхтаваць увесь карабельны склад, каб максімальна наблізіцца да стандартаў NATO і браць удзел ва ўсіх супольных з NATO задачах. Наступным этапам стане ўзбраенне катэраў - працэс, які мы зможам увасобіць у жыццё ў найбліжэйшай перспектыве», - заявіў камандуючы ВМС ВС Украіны адмірал Ігар Варончанка.

Пасля заканчэння выпрабаванняў «Славянск» і «Старабельск» будуць уключаныя ў склад ВМС і пачнуць дзяжурства ў гарантаванні марской бяспекі ў водах Чорнага і Азоўскага мораў, адзначылі ў прэс-службе.

Там дадалі, што дзякуючы сваёй хуткасці, манеўранасці і ўзбраенню такія катэры здольныя выконваць значны спектр задач, уласцівых класічным надводным караблям.

У чэрвені 2017 года ў Вайскова-марскіх сілах Украіны заяўлялі, што ўзброеныя сілы ЗША плануюць перадаць украінскаму флоту катэры Islands пасля вучэнняў Sea Breeze, якія скончыліся 23 ліпеня.

Урачыстая перадача катэраў адбылася 27 верасня 2018 года. Украіне яны дасталіся паводле праграмы «залішняга абароннага абсталявання» (Excess Defense Articles, EDA) бясплатна. Але праз бюракратычныя працэдуры рэальная перадача зацягвалася гадамі, адзначае выданне «Крым.Реалии».

У расследаванні праграмы «Схемы» (супольны праект «Радіо Свобода» і канала «UA: Першы»), апублікаваным 30 сакавіка 2018 года, адзначалася, што ЗША даўно гатовыя перадаць украінскім ВМС катэры Island, аднак Украіна адмаўляецца ад гэтага з «меркантыльных меркаванняў кіраўніцтва дзяржавы». Пра гэта распавялі журналістам крыніцы ў амерыканскім Сенаце і Пентагоне.

21 кастрычніка ў Адэсу на сухагрузе Ocean Freedom прыбылі два патрульныя катэры класа Island.

Патрульныя катэры класа Island маюць водазмяшчэнне 168 тон, даўжыня катэра - 34 м, шырыня - 6,4 м. Развівае хуткасць да 29,5 вузла (амаль 52 км/г). Каманда, згодна з нарматывамі ЗША, складаецца з 16 чалавек, у тым ліку двух афіцэраў. З узбраення на катэры ёсць 25-мм гармата і два кулямёты, паведамляла выданне «Цензор.НЕТ».

Усяго ў 1985-1992 гадах для берагавой аховы Злучаных Штатаў Амерыкі пабудавалі 49 катэраў класа Island. 37 з іх прадаўжаюць службу ў берагавой ахове ЗША, іншыя караблі ЗША ўжо перадавалі Пакістану, Грузіі і Коста-Рыцы. 32 украінскія маракі прайшлі навучанне і падрыхтоўку для службы на катэрах Island, пісала выданне «Крым.Реалии».