Заіка пра візіт Лукашэнкі ў ААЭ: Лепш бы беларусы спыталі, чаму 25 гадоў?

Паездка ў Эміраты – ніякая не працоўная.

Кіраўнік аналітычнага цэнтра «Стратэгія» Леанід Заіка ў каментары udf.by заклікаў не шукаць у паездцы кіраўніка краіны справавыя задачы.

«У гэты ж час я з'ехаў з сынам адпачываць на Балтыйскае мора. А Лукашэнка з сынамі надумаў паехаць на паўднёвыя моры. Які яшчэ працоўны візіт?! Проста наступілі школьныя канікулы, ён павёз сына, я павёз сына. Вы б яшчэ спыталі ў мяне, які вынік будзе мець наш выезд з сынам на Балтыку. Не трэба фантазіяваць і прыдумляць схаваны падтэкст. Усё, што можна сказаць з гэтай нагоды: Аляксандр Рыгоравіч – добры тата. Яго можна нават у прыклад паставіць: мужыкі, што вы на працу ходзіце, на заводы – бярыце дзяцей і едзьце ў час канікул з ім адпачываць», – з сарказмам сказаў Заіка.

Эканаміст таксама дадаў:

«Аляксандр Рыгоравіч – пенсіянер (сёлета яму споўнілася 65 гадоў – заўв.). А пенсіянеры – па-за крытыкай. Чаго ім браць адпачынак? Калі хочаце, мяркуйце, што ў мяне быў навуковы візіт на Балтыку: я вывучаў размяшчэнне целаў уздоўж і ўпоперак мора. А ў Аляксандра Рыгоравіча быў палітычны візіт: ён вывучаў абстаноўку на Арабскім Усходзе».

Кіраўнік аналітычнага цэнтра «Стратэгія» прапанаваў задаваць пытанні кіраўніку краіны з іншай нагоды.

«Лепш бы беларусы спыталі: чаму 25 гадоў? А пытацца пра адпачынак наіўна. Ён гаспадар у краіне, захацеў – паехаў, ніхто ж не супраць?» – адзначыў Заіка.