Харватыя пяройдзе на еўра да 2024 года
7- 12.11.2019, 16:06
- 9,690
Кіраўнік урада мяркуе, што краіна толькі ад гэтага выйграе.
Прэм'ер-міністр Харватыі Андрэй Пленкавіч заявіў у аўторак, што стратэгічная мэта краіны - выканаць неабходныя крытэрыі і ўвесці еўра да канца наступнага тэрміну ўрада.
Як піша "Еўрапейская праўда" са спасылкай на Reuters, пра гэта ён сказаў на эканамічнай канферэнцыі ў аўторак.
Раней сёлета Харватыя накіравала Цэнтральнаму банку ліст аб намерах далучыцца да механізму валютнага курсу ЕЗ (ERM-2) - наступным крокам пасля гэтага з'яўляецца пераход на еўра.
"Мы плануем далучыцца да ERM-2 у другой палове 2020 года, там мы плануем правесці ад двух з паловай да трох гадоў. Тады пераход на еўра можа адбыцца прыблізна ў 2023 годзе ці ў пачатку 2024-га", - сказаў Пленкавіч.
Ён сказаў, што аднымі з асноўных пераваг для Харватыі ад увядзення еўра будзе ліквідацыя валютных рызык, зніжэнне кошту запазычанняў і павышэнне канкурэнтаздольнасці эканомікі.
Харватыя прыкладае намаганні, каб кантраляваць свой бюджэтны баланс і паменшыць дзяржаўную запазычанасць да 60% ВУП у найбліжэйшыя некалькі гадоў, што з'яўляецца адным з ключавых крытэраў далучэння да еўра.