У Польшчы пачаў працу Сейм новага склікання

(абноўлена)Прэзідэнт Анджэй Дуда падзякаваў палякам за ўдзел у выбарах.

Сейм Польшчы IX склікання апоўдні ў аўторак сабраўся на сваё першае пасяджэнне.

Пра гэта паведамляе "Еўрапейская праўда".

Пасяджэнне новага парламента адкрыў маршалак-сеньёр Антоні Мацярэвіч, якога абраў раней прэзідэнт сярод найстарэйшых чальцоў Сейма.

Падчас свайго выступу Мацярэвіч вітаў прысутных у зале прэзідэнта Анджэя Дуду, прэм'ера Матэвуша Маравецкага і чальцоў Савета міністраў, маршалка Сейма і Сената мінулых скліканняў, дыпламатычны корпус, апостальскага нунцыя ў Польшчы арцыбіскупа Сальваторэ Пенакіё і іншых запрошаных.

Пасля гэтага слова ўзяў прэзідэнт, падзякаваў грамадзянам за ўдзел у выбарах і выказаў задавальненне тым фактам, што ўсе агульнапольскія палітычныя сілы прадстаўленыя ў Сейме.

Эльжбета Вітэка абрана спікерам Сейма новага склікання. Эльжбета Вітэк з партыі «Права і справядлівасць», якая займала да выбараў пасаду спікера Сойма Польшчы была зноў абрана на гэтую пасаду падчас пасяджэння Сойма IX склікання. Яна была адзіным кандыдатам.

Кандыдатуру Вітэк падтрымалі 314 дэпутатаў, супраць прагаласавала толькі 11 парламентарыяў, 134 - устрымаліся, адзін дэпутат не галасаваў. За яе, акрамя дэпутатаў партыі «Права і справядлівасць» прагаласавалі 48 дэпутатаў ад левых палітычных сілаў і 30 сябраў Польскай сялянскай партыі. Супраць былі дэпутаты «Канфедэрацыі», а ўстрымаліся дэпутаты «Грамадзянскай кааліцыі».

Нагадаем, партыя "Права і справядлівасць" перамагла на парламенцкіх выбарах 13 кастрычніка, атрымаўшы 235 мандатаў - партыя парламенцкай большасці, дзякуючы чаму можа сфармаваць урад.