13 снежня 2019, Пятніца, 2:39
Засталося зусім крыху
Рубрыкі

Начальніца ўпраўлення Міністэрства аховы здароўя ў судзе параўнала сябе з беднай авечкай

12
Начальніца ўпраўлення Міністэрства аховы здароўя ў судзе параўнала сябе з беднай авечкай
ЛЮДМІЛА РАВУЦКАЯ
ФОТА: ВАДЗІМ ЗАМІРОЎСКІ, TUT.BY

Людміла Равуцкая эмацыйна выступіла ў судзе, заявіўшы «як давесці, што я не брала хабар?».

Пасля невялікага перапынку зноў аднавіўся судовы працэс паводле справы начальніка ўпраўлення фармацэўтычнай інспекцыі і арганізацыі лекавага забеспячэння Міністэрства аховы здароўя Людмілы Равуцкай. Напярэдадні пракуратура выставіла ёй новае абвінавачванне: цяпер ёй ставяць у віну не толькі атрыманне хабараў у асабліва буйнай суме, але і махлярства, піша tut.by.

- Мая пазіцыя не змянілася. Я часткова прызнаю віну: прымала падарункі, а грашовыя сродкі - ніколі! - кажа ў судзе Людміла Равуцкая, якая ў руках трымае новае абвінавачанне больш, чым на 20 старонках.

Суд Фрунзенскага раёна Менска працягнуў разглядаць справу начальніцы ўпраўлення Міністэрства аховы здароўя Людмілы Равуцкай. У зале стаіць вялікая кардонная скрынка, на якой напісана «Равуцкая Л.А.», у крымінальнай справе 23 тамы.

- Я прымала крэсла ў кабінет, вентылятар, нейкія цукеркі не ў якасці хабару, а як падарункі да свята і ніколі не з кім не мела ніякай дамоўленасці. Сумленна і добрасумленна выконвала свае абавязкі, ніколі не думала, што я злачынец, які бярэ хабар, - эмацыйна кажа Равуцкая, знаходзячыся ў судзе ў клетцы.

Пракурор выставіў новае абвінавачанне, і Людміла Равуцкая выказвае да яго сваё стаўленне. Ёй ставяць у віну хабар 10-гадовай даўніны, які, паводле версіі следства, яна атрымала ад кіраўніцы прадстаўніцтва Fic Medical Ларысы Рубцовай. Як адзначае абвінавачаная, яна не магла браць нешта ад Рубцовай у 2009-2013 гадах, яны пазнаёміліся толькі ў 2014.

- У абвінавачванні пазначаны вельмі дзіўныя тэрміны «ў адзін з дзён кастрычніка-снежня», - адзначае Людміла Равуцкая і спасылаецца на выбарчую памяць хабарадавальніка. Рубцова памятае, якія цукеркі дарыла 10 гадоў таму, але важныя дэталі - не. Напрыклад, дэталі перадачы грошай у 2018 годзе.

- Рубцова нібыта перадала мне ў машыне грошы, а я моўчкі кладу іх, як шпіён. Можна ж паслухаць запісы АВМ, яны ж ёсць, - працягвае Равуцкая.

Яна таксама катэгарычна не згодна з тым, што як сябра камісіі лабіравала інтарэсы прыватных структур. Са слоў абвінавачанай, яна галасавала за перарэгістрацыю лекаў, як і астатнія 25 сябраў камісіі Міністэрства аховы здароўя, гэта была яе праца. Заключэнне не падпісвала і дакладна ні на каго не ціснула.

- Я не ведаю, як мне давесці, што не брала хабар? - у гэты момант Людміла Равуцкая расплакалася. - За што мне давалі хабар у 2009, 2010, 2013 гадах, калі я не была тады ні на адной камісіі? (...) Высокі суд, як я павінна даводзіць, што не брала гэтыя грошы. Я спрабую усіх заклікаць да разумнага сэнсу, пачуйце мяне. Пра тое, што атрымлівала хабару, даведалася 11 чэрвеня (падчас допыту у 2018 годзе - заўвага.), а дагэтуль не ведала, што такі страшны злачынец. Усе супрацоўнікі (Міністэрства аховы здароўя - Заўвага.) мяне падчас допыту шкадавалі, не ведаю, ці можна з беднай авечкі стаць сквапнай ваўчыцаю. Што мне рабіць з гэтым? (...) Я даражыла сваёй працай і здароўем людзей у нашай краіне. Я жыццё гэтаму аддала! Як магла б зрабіць нешта супрацьпраўнае?

Як запэўнівае Равуцкая, крэсла і вентылятар ад бізнэсоўцаў яна расцаніла як дапамогу Міністэрству аховы здароўя. Яна не раз прасіла ў ведамстве купіць новы вентылятар, але так нічога і не атрымала. Са слоў абвінавачанай, гэта можна пацвердзіць у Міністэрстве аховы здароўя.

- Мяне ж праслухоўвалі, аператыўнік казаў, што ткне носам у мае словы. Хай бы хоць раз ткнулі! - дадае Людміла Равуцкая.

Сёння ў судзе Равуцкая плакала не раз, асабліва яе кранае абвінавачванне ў махлярстве. Паводле версіі пракурора, яна абяцала дапамагчы знаёмаму бізнэсоўцу зарэгістраваць касметычны крэм, які наогул не патрабаваў ніякай рэгістрацыі.

- Самае важнае ў маім жыцці - сумленнае імя. Я чвэрць стагоддзя прапрацавала ў Міністэрстве аховы здароўя, усе, хто быў у судзе, не сказаў пра мяне ніводнага дрэннага слова і гэта маё дасягненне! Гэта праўда, што я найлепшы спецыяліст у краіне, - зноў выцірае слёзы абвінавачаная.

Яна ўважае, што, магчыма, здзейсніла службовую правіннасць, але дакладна не злачынства.