Жанін Аньес: Настойваю на мірнай і дэмакратычнай перадачы ўлады ў Балівіі

Новыя прэзідэнцкія выбары пройдуць у самыя кароткія тэрміны.

Жанін Аньес, якая абвясціла сябе прэзідэнткай Балівіі на пераходны перыяд, паабяцала правесці новыя выбары ў самыя кароткія тэрміны, паведамляе dw.com.

"Я настойваю на мірнай і дэмакратычнай перадачы ўлады, якая зменіць абставіны, што ператварылі нас у таталітарную краіну", – падкрэсліла былая другая намесніца старшыні Палаты сенатараў Балівіі. Яна часова заняла найвышэйшую пасаду ў дзяржаве ва ўмовах вакууму ўлады пасля адстаўкі прэзідэнта Эва Маралеса, віцэ-прэзідэнта і спікераў дзвюх палатаў.

Дзяржсакратар ЗША Майк Пампеа павіншаваў Жанін Аньес

"Злучаныя Штаты вітаюць балівійскую сенатарку Жанін Аньес за тое, што яна выступіла ў якасці часовай прэзідэнткі дзяржавы, каб правесці свой народ праз гэты дэмакратычны пераходны перыяд у адпаведнасці з Канстытуцыяй Балівіі і прынцыпамі Міжамерыканскай Дэмакратычнай Хартыі", – гаворыцца ў заяве дзяржсакратара ЗША Майка Пампеа, распаўсюджанай Дзярждэпам 13 лістапада.

Паводле словаў Пампеа, ЗША "з нецярпеннем чакаюць супольнай працы з Арганізацыяй амерыканскіх дзяржаваў, грамадзянскімі канстытуцыйнымі інстытутамі Балівіі і балівійскага народаў, якія рыхтуюцца як мага хутчэй правесці свабодныя і справядлівыя выбары".

Маралес абвінаваціў ЗША ў змове

Новы "ўрад дэ-факта" ўжо прызналі ў Вашынгтоне. У сваю чаргу Маралес, які знаходзіцца ў Мексіцы, асудзіў гэтую пастанову ЗША і паклаў на Злучаныя Штаты адказнасць за "палітычную і эканамічную змову", ахвярай якой ён, паводле ягоных словаў, стаў.

На гэтым фоне ў Ла-ПАСЕ, дзе знаходзіцца рэзідэнцыя ўрада, прадоўжыліся сутыкненні паміж прыхільнікамі Маралеса, дэманстрантамі, якія падтрымліваюць новыя часовыя ўлады, і праваахоўнымі органамі. Актывісты, што выступілі на баку экс-прэзідэнта, закідалі тых, хто сабраўся, камянямі, паліцыянты ўжылі слезацечны газ для разгону мітынгоўцаў.

У дэпартаменце Санта-Крус двое маладых людзей памерлі ад агнястрэльных раненняў. Такім чынам, за мінулыя тры тыдні колькасць ахвяраў у ходзе пратэстаў дасягнула дзесяці, раненні атрымалі некалькі сотняў.

У адсутнасць кворуму

Раней шматнацыянальная заканадаўчая асамблея (парламент краіны. – Рэд.) не змагла сабраць кворум, неабходны, каб абраць магчымага пераемніка Эва Маралеса.

Новыя выбары кіраўніка дзяржавы павінны быць праведзеныя сама пазней – за 90-дзённы тэрмін.

Пратэсты пачаліся пасля таго, як вярхоўны выбарчы суд Балівіі, які гуляе ў краіне ролю выбарчай камісіі, 24 кастрычніка абвесціў, што дзейны (на той момант) прэзідэнт Эва Маралес перамог на выбарах кіраўніка дзяржавы ўжо ў першым туры. Самі выбары адбыліся 20 кастрычніка. Папярэднія вынікі, апублікаваныя тым жа вечарам, паказвалі на магчымасць другога тура.