Падзеі ў Балівіі: у Маскве ўбачылі паралелі

Крэмль бачыць у балівійскім крызісе папярэджанне, расейская апазіцыя - прыкмета будучых падзей.

Палітычны крызіс у Балівіі, дзе вулічныя пратэсты на фоне абвінавачванняў у парушэннях на выбарах прывялі да адстаўкі шматгадовага кіраўніка Эва Маралеса, зноў праявіў даўнія рознагалоссі ўнутры расейскай палітычнай сістэмы, калі пазіцыі прыхільнікаў Крамля і апазіцыі разышліся па ўжо знаёмых лініях, піша «Голос Америки».

Калі ў Ла-Пасе пачалі разгортвацца падзеі, МЗС Расеі паспяшаўся выказаць падтрымку Маралесу - хаўрусніку Крамля, які неаднаразова прыязджаў у Маскву з мэтай пашырэння эканамічных сувязяў. Апошні такі візіт адбыўся ў ліпені.

У заяве МЗС РФ, размешчанай на яго сайце, ведамства асудзіла «развязаную апазіцыяй хвалю гвалту», якая перашкодзіла Маралесу «завяршыць прэзідэнцкі мандат» на фоне «падзей па лякалах зрэжысаванага дзяржаўнага перавароту».

Са слоў, прэс-сакратаркі Крамля Дзмітрыя Пяскова, было б па-дурному чакаць іншую рэакцыю.

«Натуральна, гэта абсалютна кансалідаваная рэакцыя расейскага боку», - сказаў ён, адказваючы на просьбу журналістаў пракаментаваць ацэнку МЗС.

«Вядома, мы спадзяёмся, што свой лёс балівійцы будуць развязваць самі, без умяшання якіх-небудзь трэціх краін», - дадаў ён.

Агулам аргументы нагадвалі пра пазіцыю Расеі, звязаную з суседняй Украінай, дзе Масква даўно сцвярджала, што празаходняя вулічная рэвалюцыя 2014 года, у выніку якой ад улады быў адхілены іншы хаўруснік Крамля, прэзідэнт Віктар Януковіч, таксама была справай ЗША.

Як бы падкрэсліваючы параўнанне з Украінай, прарасейскія сепаратысты на ўсходзе Украіны на сваёй афіцыйнай старонцы ў Твітэры асудзілі падзеі ў Ла-Пасе, як прыход «фашысцкай хунты». Гэта быў яшчэ адзін тэзіс, які шырока выкарыстоўваўся крамлёўскімі СМІ з 2014 года, каб ачарніць так званую рэвалюцыю Майдана ва Украіне.

Прадстаўнікі расейскай апазіцыі, аднак, бачаць падзеі ў Ла-Пасе зусім у іншым ключы, што паказвае на раздробненае палітычнае асяроддзе ў Расеі.

Інтэрнэт-выданне «Проект», заснаванае праціўнікам Крамля бізнэсоўцам Міхаілам Хадаркоўскім, апублікавала матэрыял, у якім сцвярджаецца, што ў рэчаіснасці Расея, кіруючыся інтарэсамі сваёй нафтагазавай прамысловасці і энэргетыкі, выконвала ключавую ролю ў кампаніі за перавыбранне Маралеса.

У сваю чаргу, апазіцыйныя дзеячы паспяшаліся адзначыць, што прэзідэнт Расеі Уладзімір Пуцін, як і цяпер ужо былы лідар Балівіі, таксама дапускаў нацяжкі ў інтэрпрэтацыі канстытуцыйных нормаў, калі абіраўся на беспрэцэдэнтны чацвёрты тэрмін і неўзабаве павінен адказаць на аналагічныя пытанні пра тое, ці мае ён намер заставацца ва ўладзе далей.

«Карумпаваны прэзідэнт, незаконна ўтрымліваў уладу за кошт хлусні і фальсіфікацый, збег з краіны», - напісаў у Твітэры расейскі апазіцыйны лідар Аляксей Навальны, апублікаваўшы фатаграфію, на якой Маралес і прэзідэнт Расеі Уладзімір Пуцін стаяць разам.

Як і ў выпадку Украіны ў 2014 годзе, падзеі ў Балівіі зрабілі ўражанне на Маскву. Магчыма занадта вялікае. Але Крэмль узяў іх на заметку.