Ірына Халіп: Я ўбачыла велізарную колькасць новых маладых асоб
3- 16.11.2019, 14:58
- 8,254
Гэта дае надзею на змяненне сітуацыі ў Беларусі.
15 лістапада ў Менску адразу на двух плошчах - Кастрычніцкай і Свабоды - прайшла першая Сустрэча свабодных людзей. Удзельнікі сустрэчы абмяркоўвалі, #чтодальше? і як Беларусь зрабіць нармальнай еўрапейскай краінай.
У канцы сустрэчы лідар БНК Мікалай Статкевіч і вядомая журналістка Ірына Халіп заклікалі беларусаў сустрэцца 16 лістапада ў Менску на плошчы Свабоды а 18:00 у рамках легальнага выбарчага мітынгу.
Ірына Халіп падвяла вынікі ўчорашняй акцыі:
- Акцыя ўдалася. Шчыра дзякую тым, хто вымусіў нас сабрацца ў гэтай выдатнай частцы старога Менска (ля ратушы на плошчы Свабоды - рэд.).
Я сёння ўбачыла на плошчы велізарную колькасць новых, маладых асоб. Гэта вельмі важна. І мне вельмі б хацелася іх пачуць. Я спадзяюся, што заўтра (16 лістапада - рэд.) яны змогуць выступіць. Я спадзяюся таксама на тое, што нас стане больш.
Я абсалютна ўпэўненая ў тым, што ў пратэстны рух прыйдзе больш моладзі - той, якая пакуль яшчэ нават не ведае пра тое, што гэта такое. Гэтая моладзь не ведае страху - і разам мы зможам змяніць сітуацыю і зрушыць штосьці ў Беларусі.
16 лістапада мы надумалі зноў правесці акцыю ў рамках агітацыйнага пікету Алены Талстой - так што ўсё будзе легальна і законна. Тут жа, на гэтым месцы, а 18.00. І вельмі б хацелася пачуць на гэтай акцыі выступы нашай моладзі.