«Усе п'юць! А калі карову не даіць, яна ператворыцца ў быка»

Віцебскі чыноўнік распавёў «праўду-матку» пра сітуацыю ў сельскай мясцовасці.

На фермах Віцебскай вобласці няма каму даіць кароў. Віцебскі аблвыканкам разаслаў кіраўнікам сельгаспрадпрыемстваў загад: замяняць даярак, якія не выйшлі на працу, іншымі супрацоўнікамі - бухгалтарамі і ўсімі, хто ўмее. Здавалася б, смешна, аднак напраўду ў калгасах Віцебшчыны катастрафічная сітуацыя. У каментары Еўрарадыё віцебскі чыноўнік не ўтрымаўся і распавёў праўду пра сітуацыю ў сельскай мясцовасці.

"Каб не дапусціць спаду вытворчасці малака, у выпадку нявыхаду аператараў машыннага даення (далей - аператар) на працу ў тэрміновым парадку прымайце меры для замацавання загадам па сельскагаспадарчай арганізацыі работнікаў гаспадарак (бухгалтэрыя і іншыя) для замены аператараў, якіх няма", - паведамляецца ў дакуменце, які апублікаваў блогер Nexta.

Атрымліваецца, што заатэхнік або эканаміст прадпрыемства на ўсялякі выпадак павінен умець даіць кароў?

Працуюць разумова адсталыя, алкаголікі

Журналісты звязаліся з першым намеснікам старшыні камітэта сельскай гаспадаркі і харчаванні Віцебскага аблвыканкама, які падпісаў загад. Уладзімір Машэраў у размове з Еўрарадыё амаль адразу зрываецца. Відавочна, што сітуацыя з даяркамі ўжо сядзіць у яму ў пячонцы:

"Няма каму даіць кароў! - эмацыйна усклікае абласны чыноўнік. - Калі б падабралі работнікаў замест даярак, якія п'юць... У нас сапраўды не стае даярак. Працуюць разумова адсталыя, алкаголікі! Часта каровы нядоеныя, таму напісалі рэкамендацыйны ліст: калі даяркі зап’юць , каб выйшлі іншыя людзі і падаілі кароў".

Кароў даіць - гэта не касмічны карабель запускаць!

Чыноўнік кажа, што даяркі працуюць да першага заробку, а потым сыходзяць у запой і не прыходзяць на ферму. Даходзіла да таго, што кароў не даілі па некалькі дзён.

"Вы прыедзьце ў калгас, паглядзіце, што адбываецца! - абураецца віцебскі чыноўнік. - У калгасе працуе 150 чалавек, але ніхто не хоча ісці на ферму працаваць".

Уладзімір Машэраў тлумачыць, што абласныя ўлады напісалі гэты ліст, каб у калгасах навялі парадак: "Трэба замацаваць людзей, каб кароў не калечылі. Заробкі трэба плаціць, а зімой адзіная крыніца - гэта малако".

Ён кажа, што ў калгасах з усіх супрацоўнікаў хоць нехта, але ўмее карыстацца даільным апаратам: "Гэта не касмічны карабель запускаць! Калі карову не даіць, яна запускаецца: малако перагарае і карова ператвараецца ў быка. А даярка дома закрылася і п'е. Прапіла ўсе грошы - вяртаецца і доіць далей".

"Кожны дзень да гэтых баб ходзяць новыя мужыкі. Да ночы п'янства, музыка!"

З праблем у сельскай гаспадарцы Уладзімір Машэраў пераходзіць да праблем краіны. Відаць, што ў чалавека набалела.

"Кожны год у Беларусі знікае раённы цэнтр. Паглядзіце, як будуюць жыллё ў горадзе! А хто туды едзе? Уладкоўваецца прыбіральшчыцай, нараджае траіх дзяцей ад розных людзей - ёй льготны крэдыт, - кажа чыноўнік. - У Шуміліна ўвялі гатовы дом. Людзі там стаялі на чарзе на паляпшэнне жыллёвых умоў. Яна маці-гераіня - трое дзяцей. Дык там кожны дзень пагулянка! Кожны дзень да гэтых баб ходзяць новыя мужыкі. Да ночы п'янства, музыка! Народ гуляе".

Што збіраюцца рабіць з даяркамі віцебскія ўлады? Пакуль канкрэтнага плана развязання праблемы няма. Каб каровы на фермах вобласці былі падоеныя, з горада збіраюцца вазіць часовых работнікаў.