Таксісты выйшлі на мітынг і зладзілі страйк
26- 17.11.2019, 8:43
- 24,103
Акцыя прайшла ў Менску.
На паркоўку гіпермаркета «Карона» ў сталічным мікрараёне Уручча з трох гадзін дня суботы пачалі з'язджацца аўтамабілі з налепкамі службы «Яндекс.Такси» і без іх. Кіроўцы незадаволеныя ўмовамі агрэгатару і хочуць павышэння тарыфаў, а таксама зніжэння адсотка, які трэба плаціць кампаніі, паведамляе tut.by.
Таксісты - народ шумны і вясёлы, нават калі нагода для збору далёка не радасная. Суботняя сустрэча - першая спроба заявіць аб сваёй незадаволенасці.
- Заказы па 3,30 (мінімальны кошт паездкі, у які ўваходзіць 5 хвілін і 3 км. - заўвага. Tut.by) вельмі жорстка б'юць па кішэні ўсім. Па той сістэме, якая ёсць у «Яндэксе», каб зарабіць нейкія нармальныя грошы, трэба працаваць па 16 гадзін. Вось глядзіце, калі ўзяць заробак кладаўшчыка, грузчыка - у сярэднім гэта блізу 800 рублёў у Менску. Вось колькі трэба катаць на «эканоме», каб чыстымі зарабіць такую суму? Гэта па 16 гадзін, і ў выхадныя трэба ездзіць!
Мужчыны прыводзяць свае разлікі.
- Вось узяць паездку на 5 рублёў. Мы аддаём 23% Яндэксу, 15-20% - перавозчыку, груба 40-45% з пяці рублёў сышлі. З пакінутых трох рублёў адкінем амартызацыю, паліва. У лепшым выпадку застанецца 1,5 рубля. А калі яшчэ аўто ў крэдыт? Каб яго адпрацаваць, пры такіх умовах прыйдзецца ездзіць і ездзіць.
Журналісты здзівіліся - як можна ездзіць па 16 гадзін. А як жа рэжым працы і адпачынку? Ён жа павінен выконвацца і кантралявацца сістэмай.
- Бываюць збоі сістэмы, - тлумачаць кіроўца. - У мяне неяк выскачыла такое паведамленне: «Вас адключаць праз 15 хвілін». А потым усё, працуй колькі хочаш.
- Нам бы яшчэ гадзінку ў дзень дадаць, было б нармальна, - смяюцца мужчыны. - А так працуем дзеля працы. Шчыра, калі працаваць паводле заканадаўства, ад званка да званка з рэжымам працы і адпачынку, ты не заробіш наогул нічога.
Яшчэ адна набалелая праблема - паездкі на далёкія адлегласці. Са слоў тых, хто сабраўся, яны выходзяць ледзь не ў страту.
- На далёкія адлегласці становіцца немагчымым ездзіць. Возьмем той жа аэрапорт. У адзін бок на «эканоме» выходзіць 30 рублёў. А знаходзішся там па факце 4 гадзіны. У аэрапорт едзеш за 30 рублёў, там стаіш дзве гадзіны ў чарзе, каб узяць зваротную замову. У выніку атрымліваецца 60 рублёў за 4 гадзіны. А можаш з'ехаць у «Вялікі Камень» за 6 рублёў. І там цябе ў чаргу ставяць яшчэ на тры гадзіны. Альбо можаш ехаць назад пусты. Паездка ў пасёлак Сокал каштуе 9 рублёў. Гэта проста абсурд. Вяртацца пустым? Дык лепш наогул тады туды не ехаць, а зрабіць дзве замовы за 3,30, - абураюцца таксісты.
Цяпер прысутныя хочуць, каб у кампаніі проста даведаліся, што людзі незадаволеныя і хацелі б нешта змяніць. Калі рэакцыі ў адказ не будзе, то таксісты гатовыя выкарыстоўваць іншыя меры, каб іх пачулі.
- Звяртацца ў менскі офіс «Яндэкса» бескарысна, там сядзіць тры чалавекі, яны наогул нічога не вырашаюць. Кажуць - пішыце ў службу падтрымкі. Пакуль мы проста сабраліся, каб нас заўважылі і пачулі. Калі ў далейшым ніякія крокі не будуць прынятыя, то ўжо можна пераходзіць да іншых дзеянняў. Але разумееце, шмат прыязджаюць з іншых гарадоў, яны і па цяперашніх тарыфах будуць катаць шчаслівыя, таму што ў іх гарадах яны яшчэ ніжэйшыя. Там наогул ёсць паездкі па два рублі і нават менш.
Кіроўца, які прадставіўся Аляксеем, катэгарычна не згодны з тым, што праца таксіста – нізкакваліфікаваная.
- Гэта стаўленне мяне проста раз'юшвае. Кіроўцу трэба сачыць за аўтамабілем, за чысцінёй, за бяспекай пасажыра, за ўсім. Кіроўца адказвае за пасажыра. Калі з яго віны нешта здарыцца, ён усё роўна будзе адказваць. Таксіст нясе каласальную адказнасць, і яго праца павінна быць адэкватна ацэненая. Ніхто не кажа, што таксіст павінен зарабляць залатыя горы, але нармальна аплачвацца яго праца павінна.
Прагучала нямала скаргаў на пасажыраў. Распавядаюць пра такія выпадкі, якія і апісваць неяк непрыемна.
- Мала таго, што за капейкі працуем, дык яшчэ і пасажыры трапляюцца такія, што патрабуюць ад кіроўцы сэрвісу, як-быццам замовілі лімузін. Ім тлумачыш, што вы едзеце на тарыфе эканом, з адпаведным узроўнем камфорту. Аднойчы едзем з дамай па свежаму асфальту. Яна пачынае абурацца - у вас у салоне смярдзіць. Я ёй тлумачу - гэта асфальт толькі што паклалі, ад яго такі спецыфічны пах. Кабета не слухае, кажа: я буду пісаць на вас скаргу. Піша, мяне часова блакуюць. І ты нават гэтых паўтара рубля не заробіш, - распавядае адзін з таксістаў.
Журналісты пацікавіліся, якіх тарыфаў прысутныя хочуць дамагчыся ад сэрвісу.
- Рубель за кіламетр! - жартуе нехта з натоўпу. - Напраўду, неабходны нейкі сярэдні тарыф, набліжаны да традыцыйных службаў таксі. Там роскід - ад 40 да 60 капеек за кіламетр. У нас атрымліваюцца самы нізкі тарыфы - 30 капеек, а патрабаванні да стандартаў абслугоўвання проста завышаныя.