Расея перадала Украіне захопленыя караблі

Судны накіроўваюцца ў Адэсу.

Перадача ўкраінскаму боку трох караблёў ВМФ, затрыманых у лістападзе 2018 года ля Керчанскай пратокі, адбылася, паведамілі ў МЗС РФ, піша ТАСС.

Вызваленыя ўкраінскія вайсковыя катэры «Бярдзянск» і «Нікапаль», а таксама буксір «Яны Капу» накіроўваюцца ў Адэсу.

Пра гэта намеснік міністра замежных спраў у пытаннях еўрапейскай інтэграцыі Алена Зеркаль паведаміла ў сацыяльнай сетцы Facebook, інфармуе УНІАН.

«Пакуль «Бярдзянск», «Нікапаль» і «Яны Капу» накіроўваюцца дадому ў Адэсу, каманда Міністэрства замежных спраў накіроўваецца ў Гаагу, дзе ўжо ў чацвер адбудуцца першыя слуханні арбітражнага трыбунала паводле справы аб парушэнні імунітэту трох украінскіх вайскова-марскіх суднаў і 24 чальцоў іх экіпажаў (Украіна супраць Расейскай Федэрацыі) Канвенцыі ААН у марскім праве», - напісала яна.

Намесніца міністра дадала, што «барацьба за хлопцаў і караблі пачалася з моманту іх незаконнага затрымання». Яна адзначыла, што «доўгі час усе нашы палітыка-дыпламатычныя намаганні і намаганні нашых партнёраў для іх вяртання дадому былі марнымі».

«1 красавіка 2019 года, у адпаведнасці з патрабаваннямі Міжнароднай Канвенцыі ААН у марскім праве мы паведамілі Расейскай Федэрацыі аб спрэчцы на Канвенцыі ААН аб марскім праве. Таму што захоп і ўтрымоўванне ўкраінскіх вайскова-марскіх караблёў і чальцоў іх экіпажаў з'яўляюцца грубым парушэннем Расеяй імунітэту вайсковых караблёў, гарантаваных нормамі міжнароднага звычайнага і марскога права. Міжнародны трыбунал у марскім праве 25 траўня 2019 года на запыт Украіны абавязаў Расею неадкладна вярнуць пад кантроль Украіны «Бярдзянск», «Нікапаль» і «Яны Капу», а таксама 24 чальцоў іх экіпажаў. Аднак загад Міжнароднага трыбунала не быў і не з'яўляецца самамэтай. Наша мэта - устанаўленне парушэння права, аднаўленне яго і атрыманне належнай кампенсацыі», - адзначыла Зеркаль.

У гэтай сувязі намесніца міністра адзначыла, што «менавіта гэта і закладзенае ў пазове МЗС ад 1 красавіка 2019 года». Акрамя таго, яна дадала, што ўкраінскі бок збіраецца «давесці ўсяму свету і арбітражнаму трыбуналу, што праход 25 лістапада 2018 года быў мірным і законным, а дзеянні Расейскай Федэрацыі, у тым ліку ў крымінальным пераследзе нашых маракоў, з'яўляецца парушэннем нормаў міжнароднага права».