Даляр выявіўся мацнейшым за Мадуру
- 18.11.2019, 15:54
- 12,380
Дыктатар быў вымушаны павітаць далярызацыю Венесуэлы.
Кіраўнік Венесуэлы Нікалас Мадура вітаў працэс далярызацыі эканомікі ягонай краіны. Свабоднае абарачэнне валюты ЗША ў Венесуэле мае ролю "ахоўнага клапана", які можа дапамагчы краіне ў пераадоленні эканамічнага крызісу, заявіў Мадура ў тэлеінтэрв'ю ў нядзелю, 17 лістапада, паведамляе dw.com.
"Я не бачу нічога дрэннага...у працэсе, які называюць "далярызацыі ", - адзначыў Мадура, які раней забараняў выкарыстанне даляра ЗША. Пры гэтым ён дадаў, што балівар па-ранейшаму застаецца афіцыйнай валютай Венесуэлы.
Лібералізацыя валютнага рынку
За гэты год суверэнны балівар страціў у кошце больш за 90 адсоткаў. У траўні Цэнтральны банк у Каракасе дазволіў камерцыйным банкам краіны свабодную куплю і продаж замежнай валюты, якая з 2003 года знаходзілася пад жорсткім кантролем дзяржавы. Фактычная забарона на аперацыі з замежнай валютай прывяла да ўзнікнення значнага чорнага рынку, на якім даляр каштаваў у дзясяткі разоў вышэй за афіцыйны курс.
У Венесуэле ўжо многія гады ідзе барацьба за ўладу паміж леванацыяналістычным урадам на чале з Мадурам і правацэнтрысцкай апазіцыяй. У студзені старшыня парламента Венесуэлы Хуан Гуайдо быў абраны прэзідэнтам краіны. З тых часоў яго прызналі больш за 50 дзяржаў, у тым ліку ЗША і Нямеччына.