У Ганконгу студэнты-дэманстранты ператварылі свае ВНУ ў «цытадэлі»

Яны абараняюцца лукамі і катапультамі.

Некалькі дзён таму пратэсты ў Ганконгу выйшлі на новы ўзровень: студэнты як мінімум двух універсітэтаў ператварылі будынка кампусаў у «цытадэлі». Адтуль бараніліся ўсім, чым толькі можна: самаробнымі лукамі, катапультамі, а таксама брукам і кактэйлямі Молатава. Некалькі разоў паліцыя спрабавала ўзяць будынкі штурмам, але дагэтуль політэхнічны ўніверсітэт знаходзіцца па-за кантролем уладаў. Здымкі з месца публікуе агенцтва Reuters.

На мінулым тыдні студэнты ўзялі пад кантроль некалькі ВНУ, больш за ўсё людзей сабралася ў Кітайскім універсітэце ў Ганконгу і політэхнічным універсітэце там жа, піша tut.by.

Як паведамляе CNN, усё пачалося са спробы паліцыі «зачысціць» дэманстрантаў сярод студэнтаў. У адказ маладзёны схаваліся ва ўніверсітэтах, адкуль пачалі весці абарону. На дарогах да ВНУ яны выставілі канструкцыі з цэглы, каб абцяжарыць праезд спецтэхнікі.

Далей яны выставілі барыкады, збудаваныя з чаго папала: у ход пайшла нават мэбля з навучальных класаў, як, напрыклад, парты на фота ніжэй.

Барыкады аблілі гаручым, каб падпаліць пры спробе штурму. На месцы ўвесь час дзяжураць супрацоўнікі экстранных службаў. У адказ паліцыя таксама пачала ўзводзіць свае барыкады, каб утрымаць усіх мітынгоўцаў у адным месцы.

Сітуацыю па перыметры студэнты кантралююць з вышак. Здымак з Кітайскага універсітэта:

Студэнты адстрэльваюцца чым папала, напрыклад самаробнымі катапультамі, а таксама лукамі і дроцікамі, узятымі са спартовага інвентару ў захопленай політэхнічнай ВНУ. Вядома, што 17 лістапада пры спробе штурму стралой быў паранены афіцэр паліцыі.

Паводле інфармацыі выдання «Голас Амерыкі», політэхнічны ўніверсітэт - як мінімум адзін з пяці ВНУ, дзе студэнты будавалі барыкады. Да суботы ўсе астатнія ў асноўным пакінулі будынкі, і толькі ў «палітэху» яшчэ трымаюць абарону.

Пасля ночы закалотаў 17 лістапада некаторыя са студэнтаў спрабавалі сысці з тэрыторыі кампуса, але былі вымушаныя вярнуцца праз ужыванне паліцыяй слезацечнага газу і так званых губчатых гранат. Сёння іх папярэдзілі, што калі і далей будуць кідаць камяні і запальныя сумесі, то супраць іх пачнуць ужываць баявыя патроны.

«Я не ведаю, як доўга мы зможам прадаўжаць у тым жа духу. Нам можа спатрэбіцца міжнародная дапамога», - распавёў Reuters адзін з дэманстрантаў, 19-гадовы мітынговец па імені Дэн.

Яшчэ адзін 24-гадовы студэнт заявіў, што ледзь не задыхнуўся ў натоўпе: «Мы наогул не маглі рухацца. Паліцыя не спынялася, яны ўсё яшчэ выкарыстоўвалі гумовыя кулі і губчатыя гранаты, каб напасці на нас. Мы гаворым аб адлегласці адзін метр».

Толькі за мінулую нядзелю падчас штурмаў у Ганконгу былі параненыя як мінімум 38 чалавек, паведамляла The Guardian. Паводле інфармацыі відавочцаў, некаторыя з іх атрымалі апёкі ад хімікатаў, якія распыляе паліцыя з вадзяных гармат.

Спроба штурму політэхнічнага ўніверсітэта паўтарылася і раніцай 18 лістапада. Пацярпелі яшчэ як мінімум з дзясятак чалавек.

Некаторыя дэманстранты змаглі пакінуць будынак пасля таго, як кіраўнік ВНУ паведаміў аб згодзе паліцыі прыпыніць ужыванне сілы.

Паводле інфармацыі мясцовага выдання RTHK, яшчэ як мінімум 500 чалавек застаюцца ўнутры.