У Менску рабочыя білі дырэктара малатком па каленях, пакуль той не выдаў затрыманы заробак

Рабочыя наважылі аднавіць справядлівасць.

Гісторыя і сапраўды нагадвае ліхія 90-я, калі магчыма было магчымае і немагчымае. Трывожны званок у міліцыю паступіў 16 лістапада са сталічнай медустановы. Туды з траўмамі ног, а дакладней, каленных рэпак, паступіў мужчына, які распавёў медыкам цікавую гісторыю, піша kp.by.

Ён - дырэктар адной са сталічных фірмаў. Напярэдадні вечарам ён выйшаў з офіса, падышоў да свайго аўто, сеў у яго, каб паехаць дадому. Але не паспеў крануцца, як дзверы адчыніліся і ў аўтамабіль падсеў ягоны супрацоўнік. Яшчэ адзін мужчына застаўся стаяць каля аўто, так бы мовіць, на шухеры.

Далей пачаліся разборкі. Супрацоўнік стаў патрабаваць у дырэктара заробак, які ён завінаваціўся сваім рабочым, а калі зразумеў, што аргументы не дапамагаюць, дастаў малаток і стаў у даслоўна выбіваць свае грошы - малатком па каленных рэпках.

І, трэба сказаць, выніку ён дамогся. Выбіў з дырэктара 350 беларускіх рублёў і ўцёк з суўдзельнікам.

Абодвух знайшлі па гарачых слядах.

- Аператыўнікам нападнікі растлумачылі, што прычына іх учынку - непрыязныя стасункі з дырэктарам праз тое, што той своечасова не выплачваў заробак, - распавялі ў прэс-службе ГУУС.

Як толькі навіна разляцелася па інтэрнэце, беларусы сталі вельмі актыўна на яе рэагаваць. Прычым, нечакана: у каментарах вялікая частка людзей не асуджаюць, а, наадварот, масава падтрымліваюць нападнікаў.

- Начальніка трэба было затрымаць, а не гэтых небарак. Людзям жыць няма за што. 90-я зноў наступаюць... Хоць тады было прасцей. Былі спецыялісты па выбіванні пазык, і іх баяліся. А цяпер - беззаконне, - пішуць адны.

- Не асуджаю работніка. Яго, на жаль, хутчэй за ўсё, пасадзяць, але начальнік наступным разам, мажліва, пабаіцца людзей кідаць. Працадаўцы так знахабіліся, што кідаць рабочых сталі, як у Расеі, - пішуць іншыя.

- У дачыненні да злачынцаў распачатая крымінальная справа на падставе ч.3 арт.384 КК Беларусі. «Прымус да выканання абавязкаў», - распавяла афіцыйная прадстаўніца УСК Менску Кацярына Гарлінская. - Артыкул прадугледжвае пакаранне ў выглядзе пазбаўлення волі на тэрмін ад трох да дзесяці гадоў. Вядома, што нападніку, які нанёс удары дырэктару фірмы, 38 гадоў. Цяпер ён знаходзіцца пад арыштам. Ягонаму суўдзельніку 52 гады. Мера стрымання, якую да яго ўжылі, - абавязацельства аб прыходзе. Здароўю пацярпелага нішто не пагражае. У яго закрыты пералом носа і ўдар калена.

Прадпрыемствы Меншчыны завінаваціліся работнікам мільёны даляраў

Выявілася, абурэнне беларусаў мае падставы. У Генпракуратуры Беларусі пацвердзілі: «Праверкі паказалі: толькі ў трох арганізацыях Менскай вобласці запазычанасць у выплаце заробку цяпер складае больш за мільён даляраў. Наймальнікаў, якія не выконвалі тэрміны і парадак выплаты заробку, прыцягнулі да адказнасці»

У якасці прыкладу ў пракуратуры распавялі пра выпадак, калі на адным з прадпрыемстваў нават пасля ўмяшання пракурораў работнікам выплацілі заробак не цалкам. Для гэтага кіраўніцтва звярнулася ў банк і ўзяло крэдыты для выплаты завінавачанасці ў заробку.

Усяго ж у Менскай вобласці пракуроры вынеслі 27 актаў нагляду за прадпрыемствамі, дзе супрацоўнікам своечасова не плацяць заробак, 10 кіраўнікоў прыцягнулі да адміністрацыйнай адказнасці.

Юрыст: «Калі наймальнік не плаціць заробак рабочым, той і сабе яе налічаць не мае права»

Як абараніць свае правы, калі заробак не плацяць своечасова, распавяла юрыстка Алена Новікава.

- Паводле закона заробак уважаецца за затрыманы, калі не выплачваецца ў належны па дамове дзень. Да прыкладу, вы павінны былі атрымаць заробак 15-га. Значыць, з 16-га надыходзіць пратэрмінаваная запазычанасць, а з 1-га наступнага месяца - запазычанасць у выплаце заробку, пра якую трэба паведамляць у статыстычныя органы. З 15 дня наступнага месяца запазычанасць ужо падлягае выплаце з індэксацыяй - чым даўжэйшая затрымка, тым большая сума, якую вам павінны заплаціць, - тлумачыць юрыстка. - Дарэчы, паводле закона, сам кіраўнік не мае права атрымаць заробак, калі яго не выплацілі астатнім работнікам. Запазычанасць дырэктару кампенсуецца прапарцыйна астатнім супрацоўнікам. Выключэнне - бюджэтныя і субсідаваныя кампаніі.

- Хто і як паводле закона адказвае за затрымку заробку?

- Адказныя наймальнік і ўпаўнаважаныя кіроўныя супрацоўнікі кампаніі. Наймальніку пагражае адміністрацыйны штраф да ста базавых адзінак. Гэта значыць, да 2550 рублёў. Таксама дырэктару не выплачваюцца прэміі, надбаўкі і бонусы за вынікі працы цягам года. Кіроўным работнікам за нявыплату заробку таксама пагражае штраф - 4-20 базавых адзінак. Гэта значыць, 102 - 510 руб. Вінаваты ў нявыплаце начальнік можа быць звольнены на ініцыятыву ўласніка фірмы або органа кіравання. Да прыкладу, назіральнай рады.

- Куды можна звяртацца, калі не плацяць заробак?

- У камісію ў працоўных спрэчках, дэпартамент дзяржаўнай інспекцыі працы Міністэрства працы і сацыяльнай абароны РБ, пракуратуру і суд.