«У адну чарку ён наліў ваду»: як «камунальнікі» падманваюць беларусаў

Што трэба ведаць, каб абараніцца ад ашуканцаў.

Іх мэта - не даць вам апамятацца. Пакуль вы думаеце, што да вас прыйшлі прадстаўнікі ЖЭСа або Мінгазу, вас ужо палохаюць апавяданнямі пра выпадзенні шыбаў у суседзяў або выбухах газу. А потым пераконваюць набыць што-небудзь «карыснае» з нібыта вялікай зніжкай... за сотні даляраў, паведамляе «Белсат».

Як абараніцца ад агрэсіўных прадаўцоў і інспектараў бяспекі?

Часцей за ўсё аферысты прапануюць адрэгуляваць пластыкавыя шклопакеты, праверыць якасць вады, электраправодку або газавыя трубы, праверыць якасць інтэрнэту або кампутар на вірусы. Альбо проста прапануюць падарункі, бо вам пашанцавала трапіць у нейкі загадкавы спіс пераможцаў.

Усё выглядае так, быццам да вас прыйшлі прадстаўнікі ЖЭСа або Мінгазу праводзіць планавую праверку. Таму многія і пускаюць іх у дамы.

Напрыклад, да Кацярыны прыйшлі псеўдагазавікі. Запалохвалі гісторыямі аб выбухах газу і прапаноўвалі газавы датчык.

«Зніжкі прапаноўваліся пенсіянерам, шматдзетным, але калі я сказала, што пад аніводную катэгорыю не трапляю, мне зніжку ўсё адно прапанавалі. І гэта было знакам. Не, дзяржава зніжкі не прапануе», - узгадвае тую сустрэчу псіхолаг Кацярына Красаковіч.

А потым ад бацькоў яна даведалася, што тыя ўсё ж праглынулі прынаду. Газавы апавяшчальнік са зніжкамі каштаваў ім 109 рублёў. Пошук у інтэрнэце падказаў, што рэальны яго кошт 35-45 рублёў. Мінгаз прапануе апавяшчальнікі за 40 рублёў.

«Іх мэта - не даць вам апамятацца. Вось сведчанне, вось яна прайшла, «пакажыце трубу». Дзейнічаюць вельмі хутка. І паспець уключыцца і прааналізаваць, што адбываецца, не заўсёды атрымліваецца», - тлумачыць метады працы псеўдагазавікоў з пункту гледжання псіхолага Кацярына.

Гэта адна з самых важных тэм, якія абмяркоўваюцца на інтэрнэт-форумах. Людзі выклікалі на такіх гандляроў міліцыю, але яна не бачыць у іх дзеяннях прыкмет махлярства. Таму кожны змагаецца з імі, як можа - не пускаюць у кватэру, выдаляюць свае тэлефонныя нумары з базы «Белтэлекама», здымаюць гандляроў на камеры.

Кацярына тады змагла вярнуць грошы бацькоў. Патэлефанавала і прыстрашыла адсутнасцю дамовы і чэка, і тым, што апавяшчальнік хутка зламаўся. А вось да Міхаіла прыходзілі правяраць якасць вады і прапаноўваць фільтры.

«У адну чарку ён наліў ваду з гарачага крана, у другую - з халоднага, у трэцюю - з чайніка кіпячоную, а ў чацвёртую - якую прынёс з сабой», - распавядае пра той выпадак Міхаіл Дзёмін.

Гэта была нібыта чыстая, адфільтраваная вада. А потым прадавец апусціў туды нейкую электрычную прыладу, і ўся вада, акрамя адфільтраванай, змяніла колер. Напраўду гэта азначае, што звычайная вада змяшчае невялікую колькасць мінеральных соляў, а вада гандляра была дыстыляваная, і таму не змянілася пад уздзеяннем электратоку. Але гандляр пачаў палохаць, што такую нізкаякасную ваду піць небяспечна. Міхаіл проста выклікаў міліцыянта, а гандляр збег. Усе звесткі пра мінералізацыю сваёй вады, якія называў яму гандляр, Міхаіл праверыў - і зразумеў, што ў яго яшчэ вельмі нядрэнная вада.

Да таго ж аб якасці вады ў вашай кватэры можна даведацца на сайце Менскводаканала. Як гаворыцца, давярай, але сваю галаву трэба мець на плячах.