«Паспрачаўся, што зраблю»: мянчук будуе плывучы дом на Чыжоўскім вадасховішчы

Унікальны хаўсбот будуецца паволі, ад душы.

Уладзімір ужо амаль два месяцы будуе свой дом на вадзе. Ён паставіў на беразе Чыжоўскага вадасховішча намёт, кемпер і з раніцы да вечара майструе. «Дадому толькі мыцца хаджу», - смяецца мужчына. Ён распавёў tut.by, як паспрачаўся з жонкай, што пабудуе плывучую дачу.

У сацсетках задаліся пытаннем, «хто жыве на вадасховішчы» ў Чыжоўцы. Нядаўна непадалёк ад былой вёскі Карзюкоў з'явіўся невялікі дом. Пабудова трымаецца на вадзе, ля самага берага. Неяк яна выплыла ў цэнтр вадаёма і зрабіла фурор.

- Сабакары з берага нам махалі, крычалі! А мы выйшлі на сярэдзіну вадасховішча, лазню запалілі, памыліся — проста выдатна! - распавядае Уладзімір, які будуе плывучы дом.

У сям'і ёсць кватэра на вуліцы Галадзеда, а тут, на вадзе, будзе месца для адпачынку.

— Я будую хаўсбот, — тлумачыць мужчына задуму. — Еўропа ўжо амаль 90 гадоў жыве на вадзе, справа пастаўленая на канвеер. Але ў нас гэта не развіта, хоць Беларусь і краіна азёр, сінявокая. Я шмат падарожнічаў, пабачыў такіх дамоў. Неяк з жонкай на уікэндзе ў Парыжы здымалі дом на вадзе - запала ў душу! І мы гэтую мару насілі ў сэрцы доўгія гады. Час ідзе, ужо і ўнучцы споўнілася два гады. Жонка кажа: «Можа, лецішча купім?». Я сказаў:«Ты ж зямлю не любіш, давай я лепш на Чыжоўскім пабудую!». Можна сказаць, паспрачаўся з ёй. У Менску хаўсботаў няма, ёсць на Менскім моры, але там больш дарагі еўрапейскі варыянт, мой плывучы дом будзе прасцейшым.

На задуму Уладзіміра, тут з'явіцца сямейны домік на 48 «квадратаў», у якім змесцяцца сталовая, спальня, туалет, душ, лазня, тэхнічная зона. Лазню абсталяваў у першую чаргу - ужо можна парыцца.

Дом мужчына паставіў на ваду месяца паўтара таму. Плануе скончыць будоўлю да вясны.

— Не патоне?

— Не патоне! Пад ім металаканструкцыі вельмі сур'ёзныя, рэзервуары вялікага ціску стаяць: выпрабоўваў іх мінулай зімой, усё надзейна. Зраблю і дадатак - супраць нахілу. Рухавік — электрычны матор, будзе працаваць на сонечных батарэях, усё экалагічна.

Уладзімір тлумачыць, што хаўсбот - не човен, рэгістраваць у Дзяржаўнай інспекцыі маламерных суднаў яго не трэба. З пункту гледжання закона - гэта плыт або пантонная пераправа.

У раённай управе МНС і адміністрацыі жыхара Чыжоўкі падтрымалі. Маўляў, законам не забаронена, будуйце.

— Праўда, тут недалёка, ля вадасховішча, ёсць школа алімпійскага рэзерву. Хадзіў да іх не раз, прасіў у арэнду месца для хаўсбота. Там усё ж камеры, ахова. Ні за што не пагадзіліся, а шкада, - хвалюецца мянчук. - Пакуль што даводзіцца начаваць побач з будоўляй, каб не раскралі матэрыялы.

Каркас будучага дома - з фінскай фанеры, ён уцеплены, ёсць каналізацыйныя трубы і водаправод. На будоўлю ўжо сышло прыкладна дзевяць тысяч даляраў. Уладзімір мяркуе, што напэўна выдаткуе яшчэ столькі ж.

- Зусім бюджэтна дом на вадзе не пабудуеш. Усё ўпіраецца ў вагу, трэба абдумваць кожны крок. Калі дрэва - то трэба браць самае лёгкае, лістоўніцу, прычым апрацаваную, каб матэрыял не гніў. Калі шкло - энэргазберагальнае, дзверы - шчыльныя, уцепленыя, але лёгкія.

Інфармацыю па будаўніцтве плывучых дамоў беларус знаходзіць на еўрапейскіх форумах уладальнікаў хаўсботаў. Праўда, не ўсе хочуць даваць парады.

- Людзі зарабляюць на іх грошы, таму многае - сакрэт фірмы. Я нават спрабаваў уладкавацца на працу на завод у Кракаве, дзе хаўсботы робяць. Так хацелася зразумець — што да чаго, - прызнаецца Уладзімір.

Мужчына дзеля мары кінуў працу. Якую менавіта — не распавядае.

- Мая прафесія не звязаная з працай рукамі. У нейкі момант зразумеў, што надакучыла ўсё, набіраю вагу. Ведаеце, 48 гадоў — я ў такім узросце, калі мужчына ці ўпадае ў дэпрэсію, або заводзіць палюбоўніцу, або знаходзіць нейкае захапленне. І калі я пачаў будоўлю, то страціў 16 кіло вагі! Адчуваю сябе выдатна. Сям'я вельмі падтрымлівае.

Уладзімір ужо гатовы правесці экскурсію. Вось тут будзе спальня, тут сталовая.

- Зраблю барную стойку з талеркамі, келіхамі, якія будуць у паветры вісець, - ну я так уяўляю! А вось тут будзе рукамыйніца, а там — дзвюхфаерачная газавая пліта. Акно ў спальні будзе вялікае. Зраблю навес на другім паверсе, пастаўлю пад ім арэлі, шэзлонг, мангал з вяндлінай.

Мужчына ўжо купіў водную станцыю. Яна будзе перапампоўваць праз фільтры ваду з вадасховішча - чатыры ступені ачысткі. Яе плануе выкарыстоўваць для душа, мыцця, прання. Знаёмы ўладальнік хаўсбота, італіец, падказаў, як правільна арганізаваць туалет.

- У іх там гэта гатовае прадаецца, а тут даводзіцца самому вынаходзіць. Спецыяльныя бактэрыі будуць расшчапляць фекаліі, у возера будзе выходзіць ужо вычышчаная шэрая вада. Цяжкая фракцыя будзе збірацца ў касеты і ўтылізавацца асобна, - тлумачыць Уладзімір.

На зіму мужчына зняў з плывучага дома матор. Цяпер узгадвае, як хадзіў па вадасховішчу да Серабранкі, рыбаліў там з сябрамі. Тое, што гэты вадаём ўважаецца за тэхнічны, мужчыну не бянтэжыць.

- Вада брудная? Тут максімум ёсць перавышэнне ў цяжкіх металах у старых карасях, якія закопваюцца ў глей. Астатняя рыба, якую я даставаў, чыстая. А водзіцца тут судак, шчупак, падлешчык, лешч, лін, белы амур, ракі, печкуры — усё ёсць. Раз на год рыбу з Чыжоўскага вадасховішча я нашу ў лабараторыю, даследаванні паказваюць, што ўсё чыста.

Здаваць у арэнду свой плывучы дом Уладзімір не збіраецца.

- Будую яго паволі, ад душы. Так што і адпачываць тут будзем самі, гэта ж маё тварэнне.