Навукоўцы знайшлі ў метэарытах цукар
6- 22.11.2019, 10:31
- 10,548
Цукар знайшлі ў метэарытах, якім мільярды гадоў.
Міжнародная група навукоўцаў пад кіраўніцтвам Ёсіхіра Фуракавы з японскага інстытута Тахоку знайшла рыбозу і цукар у метэарытах, якім мільярды гадоў.
Пра гэта паведамляе CNN.
У трох метэарытах, адзін з якіх упаў у Аўстраліі ў 1969 годзе, знайшлі шэраг відаў цукроў. Найбольш цікавая для навукоўцаў рыбоза, таму што яна з'яўляецца надзвычай важнай у біялогіі чалавека – яна частка рыбануклеінавай кіслаты (РНК), якая сінтэзуецца ў клетках усіх клеткавых жывых арганізмаў.
Раней у навукоўцаў не атрымлівалася знайсці цукар у метэарытах, група Фуракавы змагла зрабіць гэта дзякуючы новаму метаду экстракцыі рэчываў.
Аўтары даследавання адзначаюць, што верагоднасць таго, што гэтыя віды цукру патрапілі ў склад метэарыта ўжо на Зямлі, вельмі малая.
Такім чынам, наяўнасць у такіх старажытных аб'ектах цукроў і рыбозы сярод іншага даказвае, што яны маглі трапіць на Зямлю і спрыяць утварэнню функцыянальных біяпалімераў, як РНК. Паводле адной з тэорый, менавіта РНК была першай формай жыцця на Зямлі. Таксама гэта даказвае, што цукар разам з метэарытамі можа трапляць на іншыя землепадобныя планеты.