15 лiстапада 2019, Пятніца, 22:16
Добрая навіна
Рубрыкі

Экспэрт: Цяпер Менск дэ-факта будзе вымушаны выплачваць запазычанасць перад Масквой

30
Экспэрт: Цяпер Менск дэ-факта будзе вымушаны выплачваць запазычанасць перад Масквой

Лукашэнка застаўся без расейскіх крэдытаў.

Урад Беларусі ўпершыню за шмат гадоў існавання «саюзнай дзяржавы» з Расеяй будзе будаваць фінансавую палітыку ў разліку на поўную адмову ад крэдытаў з Масквы, паведамляе finanz.ru.

У пазыковы план на 2020 год беларускі Мінфін не заклаў ні даляра новых пазык у Расеі, вынікае з «Асноўных напрамкаў бюджэтна-фінансавай і падатковай палітыкі Рэспублікі Беларусь на 2020-2022 гг».

У 2019 годзе Менск чакаў ад Масквы 630 млн даляраў у выглядзе міжурадавага крэдыту і яшчэ 200 млн даляраў у якасці апошняй раты па праграме дапамогі ад Еўразійскага фонду стабілізацыі і развіцця (ЕФСР). Але ні першы, ні другі пакет дапамогі да Беларусі да пачатку лістапада так і не дайшлі.

Пытанне аб выдзяленні Беларусі крэдытаў залежыць ад прагрэсу ў пытаннях інтэграцыі з Расеяй, прама заявіў у канцы кастрычніка кіраўнік Мінфіна РФ Антон Сілуанаў.

Рашэння аб выдзяленні грошай «можа і не быць», падкрэсліў ён. Хоць пасля паўгоду перамоў бакі нарэшце падпісалі «дарожную мапу», Беларусь упарта адмаўляецца ад ключавой расейскай умовы - пераходу на адзіную валюту.

Пра тое, што «саюзная дзяржава» «павінна на тым ці іншым этапе мець адзіную валюту», у ліпені заявіла кіраўніца Савета Федэрацыі РФ Валянціна Мацвіенка, якая пабывала ў Менску для перамоў з Аляксандрам Лукашэнкам праз два тыдні пасля таго, як кіраўнік Беларусі з'ездзіў для гутаркі з Уладзімірам Пуціным на Валаам.

Але ўгаварыць Лукашэнку, былога дырэктара саўгаса і чальца КПСС з 1979 года, не ўдалося. Пагаднення аб адзіным фінансавым рынку ў ЕАЭС і гарманізацыі грашова-крэдытнай палітыкі з РФ не прадугледжвае пераходу да наднацыянальнай валюты, ізноў паўтарыў 1 лістапада кіраўнік Нацбанка Беларусі Павел Калавур.

Той факт, што ў плане запазычанняў Беларусі на 2020 год, у адрозненне ад папярэдніх гадоў, не прадугледжанае новае фінансаванне з боку Расеі, можа выклікаць здзіўленне, бо Масква заўсёды выступала ў якасці галоўнага крэдытора Беларусі, кажа аналітык Ашчадбанка CIB Аляксандр Галынскі.

«Нават нягледзячы на памяншэнне фінансавай падтрымкі ў апошнія гады, абодва бакі імкнуліся ўтрымліваць чысты аб'ём выплат Беларусі на карысць Расеі на нулявой адзнацы», - адзначае ён: новыя крэдыты выдаваліся, каб рэфінансаваць старыя. Цяпер жа Менск дэ-факта будзе вымушаны выплачваць запазычанасць перад Масквой.

Агулам у 2020 годзе Беларусі трэба выплаціць 2,6 млрд даляраў па знешніх пазыках і яшчэ 1,2 млрд даляраў выплаціць у выглядзе працэнтаў.

Тры чвэрці гэтай сумы - 1,95 млрд даляраў - плануецца прыцягнуць за кошт новых запазычанняў: 1 млрд даляраў - праз выпуск еўрааблігацый і яшчэ 350 млн - ад размяшчэння суверэнных бондаў ў расейскіх рублях.

Дадатковыя 600 млн даляраў урад мае намер купіць на ўнутраным валютным рынку, а рэшту - выплаціць за кошт рэзерваў бюджэту.

«Шанцы на тое, што Расея выдасць фінансаванне Беларусі ў гэтым ці ў наступным годзе, застаюцца туманнымі», - канстатуе Галынскі.

На замену расейскім грошам прыходзяць кітайскія. Да канца года Беларусь разлічвае падпісаць пагадненне на атрыманне крэдыту ў 3,5 млрд юаняў (500 млн даляраў), заявіў у пятніцу міністр фінансаў Максім Ермаловіч на «Кастрычніцкім эканамічным форуме» ў Менску.

З яго слоў, Менск спадзяецца, што да канца гэтага года «ўдасца завяршыць працэдуры атрымання гэтых сродкаў, выйшаўшы на падпісанне крэдытнага пагаднення».