Bellingcat: Верхаводы «ДНР» змянілі імёны і хаваюцца
- 8.11.2019, 12:46
- 16,432
Але іх выкрылі.
Следчыя з даследчай групы Bellingcat высветлілі, што ў Расеі выдалі падробленыя пашпарты баевіку Ігару Безлеру і фігуранту справы аб крушэнні MH17, афіцэру Галоўнай разведвальнай управы РФ Алегу Іваннікаву. Пра гэта гаворыцца ў паведамленні на сайце Bellingcat 7 лістапада.
Паводле звестак следчых, Безлер з кастрычніка 2014 года жыве ў анэксаваным Сімферопалі пад імем Ігар Берагавы.
"Безлер – толькі адзін з многіх расейскіх аператыўных супрацоўнікаў, якім расейскія спецслужбы перадавалі падробленыя пашпарты падчас працы ва Украіне. Выкарыстоўваючы дзіравыя расейскія базы звестак, толькі з некалькіх асноўных біяграфічных дэталяў магчыма выкрыць падробленую асобу аператыўніка, як гэта назіраецца з іншым прадстаўніком ГРУ – Алегам Іваннікавым (Андрэй Лапцеў)", – гаворыцца ў паведамленні.
Следчыя высветлілі, што Безлеру выдалі ўнутраны расейскі пашпарт у Маскве. У ім указанае выдуманае прозвішча, але рэальныя асабістыя звесткі баевіка. Ён выкарыстаў гэты пашпарт для падарожжаў па Расеі і Украіне.
Акрамя таго, расследаванне вызначыла, што дзвюма апошнімі лічбамі адрозніваецца пашпарт, выдадзены Іваннікаву – Лапцеву. Гэта сведчыць, што дакументы былі выдадзеныя з адной партыі.
Пра падробку пашпартоў таксама сведчыць і той факт, што ў базе звестак падаткаплацельнікаў РФ няма ідэнтыфікацыйных нумароў асобаў з такімі дакументамі, мяркуюць следчыя.
Яны нагадваюць, што раней такім жа чынам ГРУ выдавала пашпарты байцам прыватнай вайсковай кампаніі "Вагнер" – у адным месцы і адной серыі.
Boeing 777, што ажыццяўляў рэйс MH17 (Амстэрдам – Куала-Лумпур), пацярпеў крушэнне 17 ліпеня 2014 года паблізу Торэза Данецкай вобласці. Загінулі ўсе 298 чалавек, якія знаходзіліся на борце.
У расследаванні Bellingcat паказвалася, што афіцэр ГРУ Алег Іваннікаў (пазыўны Арыён) датычны да дастаўкі ва Украіну з Расеі "Бука", з якога збілі Boeing 777.
Служба бяспекі Украіны абвесціла яго ў вышук.
Безлер з красавіка 2014 года ўдзельнічаў у баявых дзеяннях на Данбасе на баку прарасейскіх баявікоў. У лістападзе 2014 года быў адпраўлены "ў адстаўку" і пакінуў падкантрольную баевікам "ДНР" тэрыторыю.
Ва Украіне Безлер абвешчаны ў вышук паводле падазрэнні ў незаконным пазбаўленні волі або выкраданні грамадзянаў, тэрарызме і наўмысным забойстве. СБУ называла яго дыверсантам ГРУ РФ.
Паводле звестак тэлеканала "Цяперашні час", пражывае ў анэксаваным Крыме.