Шамана, які ішоў да Пуціна, зноў затрымалі па дарозе ў Маскву

Паўторна ён выйшаў у паход 8 снежня.

У Якуціі затрымалі шамана Аляксандра Габышава, які ішоў у Маскву «выганяць прэзідэнта Расеі Уладзіміра Пуціна» і аднавіў свой паход два дні таму. Пра гэта заявіў каардынатар праваабарончай арганізацыі «Праваабарона Паштоўкі» Аляксей Пранішнікаў, паведамляе ТАСС.

«У аўторак [10 снежня] Габышаў і некалькі ягоных паплечнікаў былі затрыманыя на тэрыторыі Якуціі. Для гэтага праваахоўнікі залучылі некалькі паліцэйскіх экіпажаў», - сказаў праваабаронца, не ўдакладніўшы, на якой падставе затрымалі шамана з аднадумцамі і куды іх павязуць.

Раней стала вядома аб аднаўленні паходу Габышава. Паўторна на Маскву ён выйшаў 8 снежня з дзвюма асобамі і чатырма сабакамі. Пранішнікаў адзначыў, што шаман больш не пад падпіскай аб нявыездзе і «не абмежаваны ніякімі мерамі».

Пра свой намер аднавіць паход Габышаў заявіў 10 кастрычніка. «Уся Расея за мяне, простыя людзі ўсе за мяне. Я буду ісці са сваім меркаваннем, хоць мільярд будзе перада мной прыхільнікаў Пуціна, хоць уся Зямля за яго будзе. <...> Мне больш значны загад бога», - сказаў ён.