Кампанія супраць акумулятарнага завода адзначана Нацыянальнай праваабарончай прэміяй

Праваабаронцам года стаў Леанід Судаленка.

У Дзень правоў чалавека ў Менску ўручылі Нацыянальную праваабарончую прэмію.

Сёлета прэмію ўручалі ў трох намінацыях: «Праваабаронца года», «Журналіст года» і «Ініцыятыва года». Вызначаюць пераможцу 9 арганізацый, у тым ліку Беларуская асацыяцыя журналістаў, Беларускі Хельсінкскі камітэт і праваабарончы цэнтр «Вясна», паведамляе tut.by.

Праваабаронцам года стаў гомельскі актывіст Леанід Судаленка. Праваабарончую прэмію «Журналіст года» атрымала аўтарка «Радыё Свабода» Ганна Соўсь. Ініцыятывай года стала кампанія супраць будаўніцтва акумулятарнага завода ў Берасці.

Нагадаем, акумулятарны завод будуе на прамысловай пляцоўцы «Аэрапорт» у свабоднай эканамічнай зоне «Берасце» ТАА «АйПаўэр». Жыхары Берасця і некалькіх вёсак Берасцейскага раёна ўважаюць, што прадпрыемства пагражае іх здароўю. З 25 лютага 2018 года кожную нядзелю на плошчу Леніна ў Берасці прыходзяць праціўнікі будаўніцтва акумулятарнага завода, якія маюць зносіны і абменьваюцца апошнімі навінамі пра будаўніцтва прадпрыемства.